Ayera atardi, presidente di SMAC Darren van Ommeren acompaña di otro miembronan di e directiva a ofrece un conferencia di prensa pa asina trece dilanti un resumen di loke Carnaval 70 tabata ta pa lo cual el a sigura cu tabata un exito y ademas tambe a informa cu nan a manda un carta pa Stichting Musica pa loke ta trata e festivalnan.

El a trece dilanti cu SMAC a keda contento con eventonan y paradanan a bay, un Carnaval 70 hopi exitoso unda nan tabatin 39 evento cu a ser realisa den 6 siman incluyendo esun di 11 di november 2023 caminda nan a habri e temporada carnavalesco y cu a culmina diadomingo ultimo 11 di februari cu e Parada Grandi na Oranjestad e cual a conta cu e participacion di 10 grupo di carnaval y un cu tabata representa Steelpan cu tambe a duna nan espectaculo.

“Nos tin cu bisa cu nos a haya un tremendo parada y un gradicimento sigur na tur grupo, participante, musico, cu a haci posibel pa nos por tin un temporada di Carnaval 70 a todo dar,” Van Ommeren a sigura.

Igualmente el a bisa cu Carnaval a conta cu e bishita di turistanan di Corsou, Boneiro, St Maarten y turistanan Mericano y Latino cu tabata disfrutando di espectaculo.

Pa loke ta trata e siguiente temporada di Carnaval 71, Van Ommeren a pidi na esnan involucra pa tur cos keda regla na tempo, den esaki, el a sigura cu ayera nan a manda un e-mail y un carta oficial pa Stichting Musica pa asina duna un oferta di loke ta trata e maneho y fechanan di e festivalnan di musica, un di e oferta ta regarda cu Stichting Musica mester haci 25.000 florin cu ta nifica e fee di contribucion na SMAC pa organisa esaki.

Un otro oferta tin di haber di tuma e festival di Calipso Roadmarch infantil y hubenil y tambe un pakete pa Caiso and Soca Monarch infantil y hubenil na un balor di 15.000 florin como pakete, of di tres oferta ta bira di tuma full e pakete di musica cu ta Festival di Tumba, Calipso Roadmarch y Caiso and Soca Monarch tur cu categoria infantil y hubenil unda Stichting Musica no mester paga SMAC nada, pero tur gasto lo keda den man di Stichting Musica, manera Van Ommeren a declara.

“Pa nos por resolve tur hecho cu por tin, nos ta pone esaki riba mesa y nan tin mas o menos 14 dia pa duna un reacciona riba esaki, si nan ta acepta of no, den un futuro un bes cu nan ta haci esaki, nan tin cu cumpli cu un contract e cual lo ta encera tambe cu nan ta riba nos schedule y e proteccion cu no lo tin evento mesun dia, ta un pakete cu nos no ta bay haci evento hunto pero practicamente nan ta encarga cu esaki y nos lo duna nan e support di ta riba nos schedule y full e mercadeo.” El a declara.

Loke SMAC ta reitera ta cu nan no kier pa otro hechonan lo sucede den futuro mirando cu no tabata documenta y awor esey ta loke nan ta haci pa pone esey riba papel y comunidad sa cu tin un oferta riba mesa.

Si den caso, Stichting Musica no ta tuma ni un di e ofertanan Van Ommeren a señala cu SMAC tin cu tuma un decision, di kico nan ta bay haci cu e festivalnan di musica y con lo hinca nan den otro.