(AP)—Manifestantenan a reuni den e capital di Slovakia y otro varios ciudad diahuebs pa protesta contra un ley aproba den parlamento cu, segun nan, por limita e libertad di expresion y obstaculisa e trabou di organisacionnan no-gubernamental (NGO).
Hende cu a reuni na Plaza di Libertad na Bratislava a compara e ley cu esun di Rusia pa “agentenan stranhero,” un ley cu a ricibi hopi critica di ta represivo. Despues nan a marcha te na e palacio presidencial pa pidi Presidente Peter Pellegrini pa veto e ley. Nan tabata grita: “No na e ley di Rusia,” y “Slovakia ta Europa.”
Parlamento a pasa e ley aki dia 17 di april cu sosten di Robert Fico, e prome minister populista, cu ta conoci pa atakenan frecuentemente contra NGOnan.
Pellegrini, un aliado di Fico, no a duna ningun comentario oficialmente riba e ley, aunke recientemente el a cuestiona algun di e politicanan di Fico. E tin te dia 2 di mei pa considera e legislacion.
E ley ta rekeri, entre otro cos, pa NGOnan publica un rapport cu detaye tocante su lidernan y donantenan cu a contribui mas cu 5.000 euro (aproximadamente 5.700 dollar) pa aña. Gobierno ta bisa cu e ley lo trece mas transparencia na e financiamento y operacion di gruponan civil.
Un analisis di Via Iuris, un organisacion, ta bisa cu e ley ta viola e Constitucion, incluyendo derecho na privacidad, libertad di expresion y derechonan pa asociacion liber, ademas di e regla di Union Europeo. Segun Via Iuris, e obhetivo di e ley ta “stigmatisa y limita e actividadnan di grupo civico.”
E protestanan na Bratislava y cinco otro ciudad ta parti di un ola di manifestacionnan alimenta pa e bishita reciente di Fico na Moscu pa tene un charla cu presidente Ruso Vladimir Putin. Fico tin plan pa bolbe bishita Moscu dia 9 di mei pa asisti na un parada militar pa conmemora 80 aña di e derota di Nazi Alemania den e Segunda Guera Mundial. Ningun otro lider di Union Europeo no a anuncia un plan similar.
“Nos a cansa di Fico,” y “nos a cansa di Rusia,” manifestantenan tabata ripiti. Organisadornan a bisa cu nan a plania protestanan pa 20 otro lugar den Slovakia y pafo di e pais pa diabierna. Fico, un figura cu ta dividi opinion tanto dentro e pais como internacionalmente, a regresa na poder na 2003 despues cu su partido izquierdista Smer (Direccion) a gana eleccion parlamentario riba un plataforma pro-Rusia y anti-Merca.
Su gobierno a tuma paso pa cambia e transmision publico pa duna gobierno control riba television y radio publico. Esaki, hunto cu un cambio den codigo penal pa elimina un fiscal special pa anti-corrupcion, a mustra cu Fico ta guiando Slovakia riba un rumbo mas autoritario, siguiendo e ehemplo di Hungria bou di liderato di e prome minister populista Viktor Orbán.
