SKOA: ‘Tur mucha tin derecho riba estudio’

SKOA (Stichting Katholiek Onderwijs Aruba) a duna un splicacion di preparacion pa 2020/2021. Tambe pa locual ta trata muchanan cu falta di documentacion y proceso pa esaki.

Manera ta conoci, pa ley di UNESCO tur mucha tin derecho riba educacion. Pero esaki tin biaha ta bira dificil den caso cu e mucha ta indocumenta. SKOA ta pidi tur mayor cu no tin permiso pa busca un seguro medico, pa cubri e muchanan stranhero kende no tin carchi di AZV.

Nan sa cu un mucha ta keda mucha, y no por bis’e cu e no mag di hunga of cana rond. Pa e motibo aki mester ta sigur, y busca un seguro medico den caso di cualkier emergencia of accidente.

Como un instancia cu ta duna educacion, nan por bisa cu si algo pasa e mucha ‘ken ta para responsabel pa gastonan?’. Sea hospital of dokter si e algo pasa cu e mucha. Esey ta e rekisito cu ta exigi na e mayornan.

E instancia tin otro exigencia pa alumnonan cu ta drenta cerca nan. SKOA tin dos localidad, Santa Famia y Laura Wernet caminda a habri dos local di klas Prisma. Esey ta pa muchanan Latino of di Caribe, cu Hulandes of Papiamento no ta nan idioma di instruccion.

Pa e muchanan aki, ta haya pa un aña largo les di Hulandes y lesamento segun e metodo Prisma, pa nan drenta e scol un aña despues. Baly a bisa cu a cuminsa cu e proyecto aña pasa, caminda cada mucha tin derecho riba e dos scol akinan.

Lo kier bin cu mas scol, pero mester tene na cuenta e punto di ekipa docente. “Tin proyecto di parti minister di enseñanza andando. Esun cu tin fondo disponibel pa duna curso di Prisma na docentenan. Nos ta wardando contesta y ta ansioso pa esey por pasa.”

Nan ta premira cu tin mas alumno cu ta bay drenta scol cu tin derecho di enseñanza y no ta corecto pa pone nan den un klas cu otro mucha, cu ya caba tin e dominio (kisas no 100%) di idioma Hulandes y Papiamento.

Baly ta expresa cu e no ta haya ta situacion husto pa e mucha cu no tin e conocemento. Pa e motibo aki a habri e localidad aña pasa. Nan intencion pa haya fondo pa ekipa docente pa nan por duna les di Prisma.

E ta bisa si cu hopi hende cu a haya e curso a bay cu pensioen. Pa e motibo aki ta birando tempo pa esunnan cu ta nobo tambe por ricibi e curso, pa asina yuda e alumno cu ta di Latino America of otro pais cu no ta papia Hulandes of Papiamento na scol.

Pa locual ta trata docente, nunca nan tin suficiente docente, pasobra semper tin esunnan cu ta grandi di edad cu ainda ta duna les. Nan ta ‘stima duna les y ta fit trahando como docente, nan ta haci’e cu mil amor’. Sinembargo ta yega un momento cu nan ta bay cu pensioen.

SKOA ta den palabracion cu IPA pa asina trece mas incentivo pa studiantenan haya e estudio pa bira un docente. Nan tin cu haci mas promocion pa mas alumno cu caba Havo, EPI lo tin interes pa bira un maestro. El a agrega e necesidad grandi cu tin den actualidad ta e grupo di kleuter, cu no tin docente. Tambe di scolnan basico, pero mas sigur esunnan di kleuter.