SKOA tocante situacion di nan trahadonan di limpiesa: “Of nos saca nan salario di subsidio of nos lo sak’e for di mayornan”

Anuesca Baly, director di SKOA, hunto cu cabesantenan di algun scol a ofrece un conferencia di prensa pa splica kico e situacion di nan trahadonan di limpiesa ta encera na e momentonan aki.

For di algun dia pasa, comunidad por a conoce e situacion di personal di limpiesa di e scolnan cu ta pertenece pa Stichting Katholiek Onderwijs Aruba (SKOA). Di esaki Baly a comenta cu esey ta un problematica cu ta existi aproximadamente for di 1997, caminda cu nunca e trahadonan di limpiesa tabatin un salario mucho bon.

For di 1997, SKOA a ricibi un carta e tempo ey den cual ta poni bon cla di Directie Onderwijs cu e salario di werksternan lo mester wordo inclui y nan lo wordo subsidia. A aclaria cu nan no lo bira ambtenaarnan na e momento ey.

Baly a pone enfasis riba e hecho cu SKOA ta un institucion cu ta duna enseñansa catolico y ta un fundacion, loke ta nifica cu ta ricibi subsidio di Pais Aruba y esaki tambe ta poni den ley.

Despues, diferente sindicatonan a trece dilanti e situacion di trahadonan di limpiesa – no solamente pa SKOA sino pa tur en general – pa asina nan por ricibi un salario adecua pa e trabao cu nan ta haci, “cu ta hopi esencial pa cada un di nos,” pa motibo cu cada un tin nan tarea sea na scol of oficina.

Na 2015 a bini un N.V bao e minister di enseñansa anterior, Michelle Hooyboer, pa motibo cu na cierto momento SKOA tabatin problemanan financiero. Na momento cu ta ricibi subsidio, ta haya un cantidad di placa pa por usa pa scol, e cabesantenan ta haya un fondo di e cual tur gasto ta wordo kita sea di buki, awa, coriente, telefon, etc.

Baly a menciona cu for di 2010 no tin ningun cambio riba esaki. “Tur cos a bira mas caro na Pais Aruba, pero e fondo a keda mesun cos.”

Ora cu ex-minister Hooyboer a sinta na mesa cu SKOA e tempo aya, SKOA a bisa cu e unico manera cu nan por haya esaki ta subiendo e schoolgeld. SKOA a gana e caso ey, pa motibo cu – mirando cu no ta tur subsidio ta wordo duna na SKOA pa cumpli cu rekisitonan – a duna e autorisacion pa cobra un schoolgeld cu awor ta na 175 florin pa cada alumno pa aña.

“Nos ta un fundacion. Nos no ta genera placa, loke ta nifica cu tur stichting di scolnan ta wordo poni bao di autorisacion y guia di Directie Onderwijs.” Den esaki Baly tambe a afirma cu tin esunnan di DPS cu ta di gobierno y cu ta cay bao minister di Enseñansa.

Ademas, el a manifesta cu SKOA no ta ricibi e salario cu e werksternan of docentenan directamente riba su cuenta, e ta trata di un proceso. Unico cos cu Directie Financien ta haci den caso aki ta paga e salario neto di cada empleado y loke ta bay pa impuesto, APFA ta yega na SKOA prome cu e 15 dia di cada luna.

Prome cu aña 2020, Baly a informa cu nan a ricibi un carta di actual minister di Enseñansa, Armando Rudy Lampe, den cual ta bisa cu mester a haci un cambio den esaki. Nan di parti SKOA a entama dos bezwaar, uno den contra di e carta cu nan a ricibi y otro tabata pa e werksternan pa e salario cu nan ta cobra y asina nan por sigui cu e proceso.

Den caso aki, Baly a comenta cu nan a bay dilanti hues, na unda a wordo bisa cu berdad SKOA no a wordo perhudica pa motibo cu minister a menciona cu salario di werksternan no lo wordo kita, nan lo sigui ricibi nan salario.

Desde 2015, segun Baly, nada no a cambia pa loke ta trata oranan di werksternan. Den tempo di pandemia aki, scolnan tabata sushi, segun Baly a sigura, bañonan tabata constantemente sushi pa motibo cu tabata 4 ora so pa dia cu por a haci e bañonan limpi.

“Por ehemplo, den un scol basico cu 7 klas y cu por tin seis baño mas e kantoor. Mester haci tur esey limpi den 4 ora y esey ta imposibel. P’esey tambe a bisa pa aumenta e oranan”, el a afirma.

Pero, si ta aumenta e oranan tampoco lo por paga 926 florin cu cada werkster ta cobra pa luna. Banda di esaki, SKOA ta puntra si nan mes tin suficiente fondo pa paga nan si aumenta e orario laboral. Pa cu esaki, Baly a menciona cu nan por saca esaki di dos manera, di manera subsidia of nan tin cu bay sak’e for di mayornan cu tin cu paga un cifra extra, “pero esey ta necesario, vooral awor”, Baly a sigura.

El a trece dilanti cu nan a haci un calculacion di parti di e mayornan, na unda ta yega na casi 555 florin (175 florin + 150 di airco= 325 + 230 florin aproximadamente pa werksternan), un cifra cu mayornan lo mester paga pa cada un di nan yiunan, dependiendo di e cantidad di alumno cu e scol tin.

Pero esaki ta algo insigur, pa motibo cu no tur mayor lo por cumpli cu e pago aki y tampoco nan lo kier yega na e punto aki, segun Baly a afirma. SKOA tin solamente 90 werkster, mientras nan mester aproximadamente 200 pa cubri casi tur 46 scol.

P’esey el a trece dilanti cu limpiesa, na e momentonan aki, “no ta un luho.” Nan ta considera e trahadonan di limpiesa como frontliners pa motibo cu si no haci scol limpi debidamente, no ta solamente e muchanan ta na peliger sino tambe e docentenan. Nos tin cu duna atencion debido, manera cu mester ta, na nos hendenan cu ta zorg pa tene nos scolnan limpi”, Baly a declara.

Igualmente, el a bisa cu nan lo sigui cana e caminda legal, pa motibo cu e caso legal cu nan a gana na april no tabata algo definitivo. Nan ta trahando riba esey y debi na Covid-19 e caso no a cana manera mester ta. “SKOA su pensamento ta cu nos scolnan mester keda limpi y nos a want’e un aña largo. Nos tin un debe di 3.5 miyon florin di tur belasting y etc, mi no ta descarta kico e consecuencianan lo ta y nos no kier esey. Nos trahadonan di limpiesa ta nos famia di scol, pero nos no por keda asina tampoco”, el a finalisa.

Di su parti, Vladimir de Cuba, cabesante di St. Aloysius School a expresa cu su persona hunto cu otro cabesantenan di otro scol ta para 200% tras di trahadonan di limpiesa, “pasobra si nan no t’ey, scol no ta habri y ta ultra necesario pa nan t’ey tur dia. Y no ta husto pa nan perde nan trabao.”