Durante un conferencia cu Stichting Katholiek Onderwijs Aruba (SKOA) a tene pa medionan di comunicacion local a trece dilanti acusacionnan grave cu recientemente minister demisionario di Enseñansa, Ciencia y Desaroyo Sostenibel, Armando Rudy Lampe a haci durante un conferencia di prensa di partido RED.

Durante dicho conferencia di prensa partido RED, Lampe a informa cu e decisionnan cu a wordo tuma door di SKOA pa loke ta trata e trahadonan di limpiesa tabata un engaño. “Nan a gaña e werksternan mes comosifuera pues cu nan a haya status di ambtenaar y mientras cu esey tabata contra ley” Lampe a sigura.

Igualmente, el a bisa cu mester coregi e situacion aki y no ta keda un otro posibilidad cu mester cumpli cu ley. P’esey nan ta lamenta con a manipula sentimento di hende y tambe opinion publico “comosifuera cu a mi ta contra e werksternan”, el a comenta.

Den un reunion cu nan a tene dia 13 di april, Lampe a afirma cu nan a pone suficiente placa disponibel y “hasta extra placa nos a pone” pa SKOA por cumpli cu limpiesa di scolnan y por paga e trahadonan di limpiesa cu tin actual, cu e subsidio extra cu nan a duna SKOA pa tur di nan por haya por lo menos salario minimo.

“SKOA ta nenga di cumpli cu sentencia di hues y ta minando nos estado di derecho, nan mes ta cobando nan graf pasobra nan debe door di no cumpli cu e sentencia di hues ta birando un debe cu ta surpasando dies miyon florin”, el a manifesta.

Pa cu esaki, Anuesca Baly director di SKOA a bin dilanti pa ofrece nan banda di medaya y a menciona cu Lampe a acusa SKOA di actonan ilegal di maneho di personal, di tin debe multimiyonario y di a instiga maestronan di scol pa demostra den contra di e mandatario.

Skoa ta rechasa cada un di e acusacionnan sin base di e mandatario, segun loke Baly a afirma y ademas a señala cu “nos ta carga responsabilidad pa tuma personal den servicio di e fundacion hunto cu Directie Onderwijs en Inspectie, SKOA ta busca y tuma personal basa riba necesidad den area, nos ta pasa tur solicitud pa Directie Onderwijs en Inspectie pa control y aprobacion, e instancia aki despues di a controla y aproba e solicitudnan ta tuma e decision final, siguiendo e procedura aki SKOA ta garantisa transparencia den tumamento di personal na trabou” Baly a declara.

Mesun cos ta conta pa e afdracht, esta pago di beneficionan social di e trahadonan di limpiesa na scol y tambe e pension di maestronan di scol.

Di acuerdo cu proceduranan existente SKOA ta ricibi e fondonan destina pa afdracht for di departamento di Finansa y ta pasa esaki pa departamento di Impuesto. Pues, e pago di beneficionan social di e trahadonan di limpiesa y e pension di maestronan ta depende di e placa cu ta bini di departamento di Finansa.

Segun Baly, nan no tin nada di haber cu situacion financiero di SKOA, “si tin prueba di actonan ilegal SKOA lo exigi un investigacion profundo y lo coopera completamente cu esaki”, e director di e fundacion a splica.

Pa locual ta e malcontento y protesta di e maestronan, Baly a bisa cu e maestronan den nan protesta a indica bon cu nan ta solidario cu e trahadonan di limpiesa, kendenan su trabou ta na peliger, SKOA ta reconoce e importancia di e trabou cu e trahadonan di limpiesa ta haci y mas ainda den e tempo di COVID aki.

Asina mes, el a informa cu SKOA ta di opinion cu si tin prueba di corupcion y ilegalidad den cualkier institucion den comunidad, specialmente esunnan cu ta traha cu placa di pueblo, mester investiga profundamente y e personanan culpabel mester sinti tur e peso di ley, pero acusacionnan infunda ta conduci na un ambiente di desconfiansa y ta afecta e trabou di SKOA den un forma negativo.

Pa e motibo aki SKOA a instrui su abogadonan pa manda un carta pa ministro demisionario di Enseñansa Armando Rudy Lampe solicitando su persona pa rectifica den un tempo di tres dia e acusacionnan serio y sin base cu e la haci den conferencia di prensa di su partido dia 6 di april ultimo y cu e la ripiti dia 13 di april.

Ademas, Baly a afirma cu nan ta wardando riba e contesta di Lampe y cu e tempo di tres dia pasa, si esey no lo tuma luga nan lo bay na e siguiente fase di tuma medidanan den ley pa asina nan por haya un rectificacion, pa motibo cu SKOA ta un institucion catolico respeta y nan ta wordo subsidia, “nos ta traha hopi duro pa laga politiconan den caso aki, atacha nos bon nomber cu acusacionnan cu no tin base”, el a sigura.

Asina mes, abogado di SKOA Bryan Coffie a informa cu nan a haya un contesta di e partido aunke e no a ofrece detayenan di esey, pero un reaccion di Lampe mes ainda nan no a hayel’e. Banda di esey, Coffie a declara cu no solamente nan ta wardando riba e rectificacion di e mandatario sino cu tambe un rectificacion di e partido mes pa motibo cu lo cual cu a wordo treci dilanti a wordo bisa den un conferencia di prensa di partido RED.

Pa finalisa, Coffie a menciona cu SKOA no por nombra ningun persona como un ambtenaar “cualkier hende cu a haya un tiki di les huridico por bisa cu cerca di un Landsbesluit bo por nombra un ambtenaar y eynan ya claramente tin algo cu no ta cuadra como un ehempel di lo cual a wordo treci dilanti”, el a expresa.

Ta importante pa destaca cu den situacion aki, mirando cu na luna di augustus muchanan ta cuminsa scol e caso no lo afecta e muchanan di scolnan di SKOA, temporada di inscripcion y re-inscripcion ta andando y nan manera di traha ta keda mesun cos, “unico cos cu ta di lamenta ta cu e acusacionnan aki ta trece mas trabou pa nos y ta necesario pa defende nos mes manera nos a menciona caba, sin base” Baly a conclui.