Segun informacion cu fuentenan di Bon Dia Aruba a ricibi ayera, SKOA tin intencion pa aumenta e suma di schoolgeld cu mayornan ta paga tur aña na 750 florin. Un suma grandi cu principalmente den temponan dificil, den cual ta lidiando cu consecuencianan di pandemia y guera, por cay hopi pisa pa mayoria di mayor.

Motibo cu ta bin cu e aumento ta relaciona na un problema cu ta bin di un par di aña atras, esta e pago di trahadornan di limpiesa (‘werksternan’). Desde januari 2020 SKOA ta bezig cu e caso aki, caminda directora di SKOA, señora Anuesca Baly a informa cu placa no ta yega pa paga e werksternan di SKOA. Aña pasa, Baly a bisa Bon Dia Aruba: “For di 2020 te cu aworaki, un aña y mey literalmente, nos ta bezig cu e caso akinan.” SKOA ta ricibi for di Aruba 970 mil florin cu mester cubri pago di casi 90 werkster y e suma aki no ta yega pa paga e werksternan ni sikiera minimumloon pa luna, locual señora Baly ta bisa no ta husto. “Nos tin casi 90 werkster aworaki, nos tin 46 scol, y si nos haci un calculacion di 970 mil dividi na tur e werksternan pa luna, cuanto esey lo sali? Nos sa cu nan no lo bay yega ni na e salario minimo pa luna, y nan merece di haya un salario mesun cos cu e otro werksternan di e otro instancianan di gobierno”, e la bisa e tempo aya.

E impasse entre SKOA y gobierno ta pa motibo cu SKOA tabata pone e gasto di salario di trahadornan di limpiesa den e post di subsidio di salario, maske nan no ta ambtenaar ni gelijkgestelden – cu tur compensacion adicional cu ambtenaar ta ricibi, manera vakantieuitkering. Pues gobierno a informa SKOA cu e gasto aki, esta mantencion di limpiesa di scolnan, mester cay entre nan gastonan di operacion.

Sinembargo, ta parce cu SKOA a continua cu e maneho y no a pone e salario manera cu gobirno a indica. A pidi subsidio di salario pa e trahadornan di limpiesa, mientras cu gobierno a indica cu ya a pone e gasto aki den e gastonan di operacion.

Asina a bin dilanti e informacion cu SKOA a informa cabesantenan di scol cu ta bay aumenta schoolgeld na 750 florin pa aña, pa asina por paga e salarionan en cuestion.

Ta existi caba un carta for di 1997/1998, den cual gobierno di Aruba ta informa SKOA cu e trahadornan di limpiesa no ta gelijkgesteld na ambtenaarnan, esta, no tin e mesun posicion huridico.

Mientras tanto a trece e asunto dilanti hues, un caso cu SKOA a inicia pero den cual no a haya rason. Segun Corte, e hecho cu nan mes a tuma trahadonan di limpiesa den servicio no ta nifica cu nan ta cay bao di e ley di ‘overige personeel’. Hues den dos caso a duna veredicto cu e posicion di SKOA no tin base den bodemprocedure. Asina mes, SKOA ta haya su mes den situacion di mester busca un otro manera pa cubri e gasto aki, y manera nan a anuncia caba den pasado, un opcion cu nan ta considera ta aumento di schoolgeld.