Ayera na mainta, SKOA a celebra Het Nationaal Onderwijs Congres of Congreso Nacional di Educacion na Renaissance Convention Center, cu participacion di centenares di maestro di tur scolnan cu e siman aki lo haya diferente tayer.
Anuesca Baly, director di SKOA, a duna di conoce cu ayera tabata e ‘dia grandi’ pa tur scolnan y maestronan di scol basico y parti di MAVO cu ta cay bou SKOA. Di mesun manera el a expresa cu tabatin diferente invitadonan for di Boneiro y Corsou, cu tambe ta participa den e congreso aki.
Durante e inicio di e congreso, a entrega algun certificado pa 11 persona cu a pasa den un trayecto di casi un aña, caminda cu nan a ricibi training pa ta ICT Coach (International Coaching Technologies) cu despues nan lo haci den scol cu muchanan.
Tambe Baly a comenta cu den nan plan di PEN 2030 (Plan Educacion Nacional 2030) nan tin cu cuminsa prepara alumnonan pa futuro cu e 21st Century Skills y digitalisacion ta parti di dje. Pa e motibo aki, Baly a specifica cu SKOA a cuminsa duna training na su hendenan, pa den 5 aña nan lo tin den cada un scol un persona cu lo por sostene nan pa locual ta trata digitalisacion.
Tocante esaki, el a bisa cu na e momentonan aki nan ta bezig tocante digitalisacion den scolnan. Hopi scol a cuminsa haci esaki riba nan mesun forsa, tin scolnan cu a wordo yuda door di Futura como por ehempel Scol Macuarima. Tambe tin scolnan cu a cuminsa traha cu iPad en bes di buki 8 aña pasa, manera Colegio Frère Bonifacius y asina tin varios scol cu ta siguiendo e caminda ey.
Di loke ta trata e tayer cu maestronan ta haya den e congreso aki, Baly a splica cu esaki ta trata di tayer pa kleuternan, por ehempel, kleuterbrain cu ta encera con e maestro tin cu trata un mucha cu ta kleuter, ki material ta uza y ki tipo di les ta duna. Tambe a comenta cu tin participacion di FAVI pa motibo cu na scol tin muchanan cu problema di bista y maestronan tin cu siña con nan mester duna enseñansa y con por traha cu nan.
Di mesun manera, el a expresa cu tambe Respaldo ta participa den e tayer en cuestion, pa yuda nan pa sostene e muchanan cu di algun manera tin cierto retonan den bida y Respaldo ta duna e docentenan e tipnan necesario. Banda di esey tambe tin tayer di diferente digitalisacion y otro temanan cu e docentenan mes a haya interes pa inscribi den esaki.
Baly a trece dilanti cu e intencion ta pa haci esaki tur aña, pa motibo cu nan lo kier sigui duna hermentnan pa maestronan por duna un miho educacion den scolnan.
