SKOA no tin splicacion pakico te ainda no tin edificio pa tres scol

Pa SKOA e ta keda un misterio di con ta dura asina hopi cu renobacionnan di scolnan. Asina Director di SKOA, Anuesca Baly a bisa riba pregunta di Bon Dia Aruba.

Manera ta conoci, Minister di Enseñansa Demisionario, Rudy Lampe a splica durante tratamento di Presupuesto 2021 cu Aruba berdad ta pagando hopi placa, pa hopi aña caba, pa espacio temporario pa algun scol, pero motibo pakico no a reconstrui por ehempel Frère Bonifacius y Scol Aloysius ta basa riba decisionnan cu no ta den su man.

E edificio di Frère Bonifacius tabata den un estado sumamente deplorabel y tabata e doño – cu ta Obispado di Willemstad – cu a duna luz berde na DOW pa basha e edificio abao. Scol Aloyisius tambe pa un parti grandi mester keda derumba pa motibo di mal condicion, pero SKOA a nenga pa esaki sosode. Consecuentemente e muchanan di e scol aki tambe ta den nan espacio temporario.

Pero SKOA tin otro interpretacion. “Nos tin 10 aña ta wardando pa nos edificio pa Frère Bonifacius. E edificio original no t’ey mas y na su luga lo mester a bin un ‘smart school’ na 2019. Pero pa un of otro motibo no a cumpli cu esaki,” Anuesca Baly a bisa. Berdad a ricibi e proposicion di DOW pa basha parti di e edificio di Scol Aloysius abao, pero SKOA a nenga pasobra kier a wak e edificio pa Scol Bonifacius prome. “Djis aki tin yen di scol basha abao y ningun ta traha. Nos ta keda riba nos punto.”

St. Aloysius ta casi 4 for di edificio y Maria Dependance, cu a bin pa absorbe e cantidad grandi di alumno di Maria College, tin suficiente alumno su mes, “cu por draai como scol separa. Nos kier un scol cu ta sostenibel. Nos no kier un scol cu no ta adecuado pa alumnonan.”

Decision di Obispado

Minister Lampe a bisa cu tabata e doño di tereno di Frère Bonifacius a tuma e decision pa basha e scol abao, pero Anuesca Baly ta enfatisa: “Tur scol di Obispado ta cay bao maneho di SKOA. Nos tin carta cu ta pone esaki bon cla. SKOA ta esun cu ta tuma decision hunto cu Obispado. Nos ta e wowonan di Obispado pa e edificionan. Dus ta SKOA ta tuma e decision. Nos tabatin reunion cu Obispado na 2019 riba Bonifacius. Obispo tabata kier mantene un scol Catolico na Playa y nos kier mescos y cu e mester ta riba tereno di Obispado.”

E operacion di e scol mes ta na un luga temporario, cu no ta adecuado pa un scol, segun Baly. “P’esey mes e scol tabatin 300 alumno y awor ta menos di mita, pasobra mayornan ta prefera un edificio cu ta adecuado, algo cu no tin awor. Pero Frère Bonifacius ta trendsetter. Ta e prome scol di iPad na Aruba. No tin buki. Si kier bay den digitalisacion, esey nos kier pa henter e enseñansa. Pero e ta esencial pa haya edificionan pa e tres scolnan,” Baly a reitera, referiendo na Bonifacius, Aloysius y Maria Dependance.

“Nos no tin bista riba presupuesto, y nos lo kier wak cuanto placa tin disponible pa scolnan na Aruba. Segun mi, nunca SKOA a haya presupuesto.” Minister Lampe tambe a bisa siman pasa cu tabatin tres miyon cu inicialmente mester a bay pa reconstruccion di St. Aloysius pero cu SKOA lo por haya e suma aki pa otro construccion. “ Si ta asina SKOA ta haya e placa pa e placa, nos lo por bati alarma, pero SKOA nunca a haya un carta di Ministerio pa informa cu nos tin 3 miyon florin disponible. Nos lo no a nenga 3 miyon pa drecha nos scolnan. Mi ta haya raro cu nos no a haya ningun carta,” el a splica.