A pesar di e acto criminal di candela intencional cu a destrui cuater local na Cacique Macuarima School dialuna madruga, fundacion Skoa a continua cu su plan di organisa su prome Skoa Expo.
Directora di Skoa, Anuesca Baly a laga sa cu lo sigui cu nan actividad di Skoa Expo, cu lo tuma luga mañan diasabra 18 di januari for di 12or merdia te 8or anochi na Renaissance Convention Center. E expo aki lo conta cu e presencia di 46 scol rond di Aruba cu ta cay bou e paraplu di Skoa, entre nan Cacique Macuarima School.
Skoa Expo.
Baly a referi cu e expo aki no solamente ta bay duna informacion, sino tambe trece bek e confiansa cu e mayornan por yega cerca e maestronan y haci pregunta. Pa prome biaha Skoa ta organisando algo asina bou e slogan: 46 scol, un fundacion y ban bin conoce nos.
E dia ey e mayornan por inscribi nan yiunan cu ta bay kleuter. Den e expo aki tur scol lo wordo organisa segun e districto cu e ta pertenece, ya sea districto di Oranjestad, San Nicolas, Noord, etc. Por ehempel, si bo ta biba na Patiastraat ya bo sa cu bo scol ta cay na Dakota.
Ademas Skoa a percura pa bin cu diferente charla den cuadro di e expo aki. E charla aki ta wordo duna door di diferente instancia of fundacion, manera FAVI. Baly a splica cu den nan scolnan tin muchanan cu tin limitacion di bista. Hasta a yega di tin alumno cu tabata completamente ciego y cu a caba den un di nan scolnan. Y te hasta awor e hoben aki ta den nan scol secundario. Esaki ta refleha cu un mucha cu limitacion no mester keda cas pa motibo di su limitacion, sino cu e por bay scol tambe.
Igualmente tin Traimerdia presente den e expo aki pa divulga informacion, ya cu varios scolnan di Skoa tin Traimerdia.
Metanan.
El a bisa cu e prome meta ta esun di bin conoce tur scol y personal di fundacion Skoa. “Pasobra nos scolnan ta haci hopi cosnan bon,” el a declara na Bon Dia Aruba.
Tin biaha ta existi un impresion den comunidad cu si un scol tin airco, television y computer, esey mester ta un bon scol. Den e caso aki y pa medio di e expo aki, Skoa kier cambia e pensamento aki cerca nos hendenan. “No! Tur scol ta un bon scol,” el a afirma.
Pero e ta haya cu abo como mayor, ora bo ta hiba bo yiu na scol bo mester ta mas interesa. Pasobra ta trata di bo yiu cu ta e parti mas importante, y sigur bo kier como mayornan lo miho pe.
“Esey kiermen cu si bo kier lo miho p’e, bo mester cera conoci cu su scol,” segun Baly. Pero no solamente bo mester cera conoci cu scol di bo yiu, sino fundamentalmente cu e persona(nan) cu bo ta confia bo yiu cune pa alrededor 8 ora pa dia.
P’esey e ta haya cu e parti di e kimamento di scol a causa tanto dolor den nos comunidad, pasobra ‘pa hopi di nos, nos scol ta nos cas. Y pa e alumno scol ta su di dos cas,’ directora di Skoa a bisa.
