Ayera mainta SKOA a organisa un Dia di Reflexion pa su docentenan di diferente scol Catolico na Aruba y empleadonan di e fundacion aki. E dia di reflexion aki a conta cu presencia di Monseñor, Luis Secco y otro miembronan di nos clero.

Directora di SKOA, Anuesca Baly a declara na Bon Dia Aruba cu e meta tras di e dia di reflexion aki ta pa trece un momento hunto tur nan docentenan y tur nan empleadonan di SKOA. El a bisa cu nan a conta cu presencia di alrededor di 855 hende den e dia di reflexion aki cu a conta cu un orador special, pastoor Morrison cu a bin for di Corsou.

El a toca e tema di “batisa y manda” caminda e religioso a bay mas den detaye kico ta precies ora bo ta batisa y manda. “Nos tur ta batisa, pero bo ta manda tambe pa haci un tarea of trabou di bo talentonan cu bon tin como persona,” el a bisa. Nan a referi na e parti cu como miembronan di SKOA nan por trece claridad den nos scolnan.

Segun Baly, e pastoor a indica cu aworaki tin diferente scuridad den mundo y hopi biaha e ta bini debi cu no tin un punto di referencia. Kiermen si tin amor, guia y un parti spiritual, bo por trece esey como referencia. Directora di SKOA ta haya cu como docentenan y trahadonan di e fundacion aki, bo por trece esaki pa e muchanan pa nan por busca e parti aki tambe na nos scolnan.

Retonan.
E ta haya cu e reto grandi cu hopi biaha nan tin ta cu e triangulo no ta un triangulo mas entre scol, cas y misa. Hopi biaha debi na problemanan di cas, caminda e mayornan no ta hunto mas, y pa diferente motibonan, e mucha no ta sinti cu e tin un guia of un hende cu por dun’e amor pa e por funciona y bira un miho persona den nos comunidad.

E ta reconoce cu esaki ta un di e retonan cu nan tin considerando cu nan ta un di e organisacionnan mas grandi na Aruba, nan ta haya hopi alumno y hopi diferente docente y trahadonan cu tambe ta confronta diferente situacion.

E mensahe cu nan a ricibi riba e dia di reflexion aki lo wordo transmiti pa e alumnonan. E luna aki ta uno caminda nan ta duna e sosten y tema pa reflexiona pa nan por sigui cu e resto di e aña escolar.

Cambio di mentalidad.
Monseñor Secco a considera e encuentro anual aki como uno importante preparando pa e celebracion di Pasco. El a declara cu na principio di november nan a celebra e reunion di tur e seis fundacion di scolnan Catolico di nos islanan, unda nan a evalua e principionan Cristian Catolico di nos scolnan. Pero tambe analisa e dificultadnan, retonan y evaluacion di cada isla riba kico ta pasando nobo cu enseñansa ta enfrenta.

Igualmente e manera di pensa y actua di nos muchanan di awendia, ta otro. “Tur cos a bira digital y electronico, y tur esakinan ta trece cambionan di mentalidad den nos enseñansa,” el a bisa.

Monseñor a trece cu preocupacion cu nan por mira cu hopi muchanan, nan manera di acerca educacion ta un tiki sin smaak, y tin manera un crisis di bay scol. “Pakico mi ta bay scol? Pa kico mi ta bay siña? E ora ey, nos tin cu anima e hobennan cu si bo no tin formacion y preparacion pa futuro, bo no por alcansa tampoco otro cosnan,” Monseñor Secco a bisa. Mientras e ta haya cu nos comunidad tin mester di hobennan cu ta bon prepara riba tur tereno. Y den caso aki, SKOA como fundacion di scolnan Catolico tambe ta hacie riba tereno spiritual.