Aña escolar (2019-2020) a caba di cuminsa, y e aña aki SKOA a cuminsa cu un idea nobo. E muchanan cu a bay MAVO y cu no a drenta HAVO scol, SKOA a cuminsa pa nan un proyecto na La Salle College cu nan a yam’e como Havo Kans Klas.
Directora di SKOA, Anuesca Baly, a splica cu normal un mucha cu no ta pasa su test di scol basico pa drenta Colegio Arubano of Colegio San Nicolas, e ta bay un MAVO. Si e mucha aki su cifra ta hopi bon den MAVO, e ta drenta Colegio.
Baly a base di su experiencia como docente pa 22 aña na Colegio Arubano, ta consciente cu e muchanan cu ta drenta di MAVO ta drenta basicamente cu un deficiencia debi cu e nivel di MAVO ta mas abou, mientras HAVO ta mas halto. E por a mira cu e muchanan cu ta den e di dos aña di ciclo basico na Colegio, ya caba tin un experticio cu e muchanan di MAVO tin’e, pero no completo.
Ta asina cu e aña aki SKOA a dicidi di tuma e iniciativa pa bin cu un HAVO Kans Klas caminda e muchanan cu a caba e prome aña di ciclo basico y kier drenta Colegio Arubano, ta haya e oportunidad pa bay den dje. El a aclaria cu solamente ta e muchanan di prome aña di HAVO,cu apesar cu ainda no a pasa e test, nan tin un HAVO schooladvies. Nan ta haya e oportunidad aki conhuntamente cu e otro alumnonan cu ta den mesun situacion.
E ta un manera pa stimula otro, pero tambe haya e conocemento adecuado. Na final di aña escolar aki (2019-2020) e muchanan aki lo tin e oportunidad, sea ta drenta un HAVO Colegio Arubano cu e experticio igual cu un mucha di ciclo basico uno, y cu ta bay over pa siglo basico dos na Colegio.
E iniciativa aki a pone e mayornan hopi entusiasma. E Havo Kans Klas tin su costo cune, debi cu SKOA mes a cumpra e bukinan. E ta un riesgo financiero pa SKOA, ya cu normalmente gobierno mester a paga pa e bukinan, pero esaki no tabata e caso e biaha aki. P’esey nan a core e risico aki, y logicamente e mayornan tin cu paga pa e material aki, ya cu e ta e manera pa duna oportunidad na e muchanan cu ta candidato potencial pa bay HAVO pa nan ta bon ekipa.
