SKOA a habri otro HAVO kansklas: Tres scol piloto pa alumno den kleuter cu no tin 4 aña ainda

Directora di SKOA, Anuesca Baly a informa cu nan a habri HAVO kansklas na aña escolar pasa na La Salle College, cu a resulta un exito. Pa e motibo ey, SKOA a dicidi di habri otro klas na Scol San Antonio.

Nan ta duna oportunidad na e muchanan cu pa un of otro motibo nan cifra no a yega pa drenta Colegio, nan por drenta e HAVO kansklas. Eynan nan por purba usando e mesun material cu ta wordo usa na Colegio. E evaluacion of puntahe ta esun mesun cu MAVO, pero e alumnonan tin e bukinan cu ta duna e posibilidad di drenta Colegio otro aña escolar, si nan ta hopi bon pa bay p’e.

Inscripcion online

Aunke aña pasa nan a cuminsa cune caba, pero e aña aki SKOA si a dicidi pa bay den inscripcion of re-inscripcion online. E ta reconoce cu Covid a hunga un rol den e decision aki cu a forsa SKOA pa bay den e direccion aki. Pa nan re-inscripcion ta importante, ya cu asina nan por sa tambe si e mayor ta desea di laga e mucha na un di SKOA su scolnan.

E ta un proceso di tur aña caminda e mayor mester re-inscribi su yiu pa asina SKOA tin tur informacion corecto ora di traha inter-diciplinariamente cu otro institucion cu ta brinda proteccion pa e muchanan.

SKOA a habri e aña aki cu tres klas den tres scol piloto caminda nan a cuminsa cu alumnonan den kleuter cu no tin 4 aña ainda. Pa ley un alumno mester tin cuater aña pa cuminsa kleuter. Of e mester cumpli 4, prome cu 1 di december. Nan a yega di entrega un plan na Inspeccion di Enseñansa pa asina evalua cual ta e beneficionan pa cuminsa cu un alumno cu no tin 4 aña ainda, pero cu e por funciona na un kleuter. Nunca un estudio a wordo haci riba e tereno aki, y SKOA kier ta innovativo riba e tereno aki.

Tambe e aña aki nan tabatin nan Congreso Nacional cu a bay totalmente virtual, y cu a resulta uno exitoso, ya cu e docentenan por a sigui tur e cursonan pa upgrade su mes for di Hulanda. Nan tabatin aproximadamente 700 hende riba un dia caminda nan a haya diferente curso di Aruba, Bonaire y Corsou.

SKOA lo mantene e tipo di congreso aki, ya cu nan kier percura cu nan docentenan por yega na un cierto nivel actualisacion. Di parti di SKOA nan lo bay monitor kico lo ta e exigencianan cu nan lo kier pa nos docentenan. Na final di dia nan kier cu nan alumnonan tin e calidad di enseñansa cu nan merece. Mescos cu nan docentenan mester haya e calidad di enseñansa cu nan merece continuamente.