E prome siman di e aña escolar nobo 2019-2020 tabata uno satisfactorio pa SKOA.

Directora di SKOA, Anuesca Baly a declara na Bon Dia Aruba cu e fundacion aki tin 46 scol rond di Aruba, y nan ta contento con tur scol a habri dia 15 di augustus ultimo. E unico scol cu no a habri tabata Scol San Hose, pa motibo di trabou di renobacion, pero dialuna ultimo e scol aki a habri.

Actualmente nan tin un poblacion di alrededor di 10 mil studiante cu un cuerpo di 630 docente, y hunto cu demas trahado, nan tin casi 900 persona den servicio di SKOA.

SKOA tin e maneho administrativo di 15 scol preparatorio y 26 scol basico – caminda un di nan ta scol special, cu ta Scol Caquetio – y 5 scol di MAVO, locual ta un presencia notabel riba tereno di enseñansa den nos comunidad. Kier men, un 85% di scolnan na Aruba ta den man di SKOA.

Nan ta un organisacion basta grandi, ya cu ta existi for di e yegada di e frère cu a institui enseñansa na Aruba na 1853. A pesar cu nan tin nan creencia como scol Catolico, nan ta tuma alumno di tur creencia, Baly a declara.

Baly a bisa cu nan a habri e aña escolar cu un toke diferente. E personal administrativo na servicio di SKOA a bishita tur e scolnan cu ta resorta den e fundacion aki pa desea nan un bon apertura di e aña escolar nobo 2019-2020.

E tabata un bunita ocasion, ya cu pa hopi di nan e bishita aki tabata un sorpresa hopi agradabel. “Ta prome biaha cu nan ta experiencia cu e personal di e kantoor ta bishita nan,” el a declara.

Reto di SKOA
Un reto di SKOA tin di haci cu e infrastructura di edificionan di scol. Nan ta un fundacion subsidia pa medio di gobierno y nan edificionan di scol no ta wordo manteni debidamente.

E hecho cu SKOA tin scolnan cu ta hopi bieu, cu tin mas cu 80 aña di existencia, ta rekeri inversion substancial pa renoba y mantene nan. Nan tin cuater di nan scolnan ubica den diferente edificio cu no ta di SKOA mes. Entre nan tin e caso di Frère Bonifacius, cu su edificio cu tabata den mal estado a wordo basha abou pa traha uno nobo, pero esaki no a sosode ainda.

Digitalisacion
Otro reto cu nan ta trahando riba dje ta digitalisacion den enseñansa. SKOA ta trahando for di un par di añanan atras pa trece digitalisacion den nos scolnan. Nan a cuminsa e proceso aki, ora cu Frère Bonifacius a bira e prome scol na Aruba cu a cuminsa cu digitalisacion den klas 5 y 6. Tur materianan nan ta hay’e via ipad. Nan tin 7 aña cu a cuminsa cu digitalisacion y e ta un ‘exito rotundo,’segun Directora di SKOA.

Nan ta implementando keto bay e parti di digitalisacion den otro scolnan, entre nan Paulus College, y nan ta bezig ariba nan mesun forsa pa trece digitalisacion den nos sistema di enseñansa.