A tuma nota cu aki na Aruba, hopi bes tin e tendencia di lubida riba un grupo di nos comunidad.
Un Isla hopi avansa, cu a logra cosnan bunita den pasado, di cual nos por ta hopi orguyoso di esaki. Pero mientrastanto cu mayoria di nos ciudadanonan ta disfruta di e logronan aki, tin un grupo cu ainda ta warda pa ricibi atencion debidamente.
Ta trata di e ciudadano cu un of otro limitacion.
A purba di inculca inclusion den nos comunidad, pero ta ora pa nos bay practica esaki, di berdad. Esaki lo trece cambionan grandi cune, cu ta sumamente necesario pa sigura cu cada cuidadano ta sinti cu nan ta pertenece.
Tin diferente organisacion cu ta brinda ayudo y sosten na e personan aki, y nos ta agradecido na nan, pa nan aportacion.
A sinta cu algun organisacion, cu a presenta ideanan existente, pero sigur hopi innovativo pa nos isla. Por ehempel, cosnan simpel manera accesibilidad pa drenta tur edificio, pa drenta transporte publico, pa eherce un deporte, pa yega scol y mucho mas.
Por crea diferente parke di recreo cu ta dispone di materialnan adapta. Tur esaki ta necesidadnan basico como ser humano, cu por percura pa un salud fisico y mental saludabel, pa e personan aki.
Reflehando bek riba e plan di gobernacion cu ta cubri puntonan hopi importante pa e inclusion den nos comunidad, y ta enfoca y priorisa nos hendenan cu limitacion, parlamento lo percura pa e desaroyanan aki haya forma y cana nan caminda debidamente, pa na final, e ciudadanonan aki por tin un miho calidad di bida.
Nos ta un solo Aruba, cu un solo meta, mehora calidad di bida di tur ciudadano.
