Cu hopi interes mi a lesa e remitido ariba Facebook cu un yamada na publico general pa bira un boluntario, miembro di e comision di un urna electoral (Stembureau) aki na Aruba. Esaki en bista di e eleccion binidero. Ami como pensionado a dicidi den mi entusiasmo pa reacciona ariba e yamada aki. E yamada no ta contene ningun exigencia pa bin na remarca pa bira miembro, solamente mester ta un votado (18 aña bay ariba y ta un Hulandes) y tambe cu mester tin permiso di e dunado di trabao pa ta presente henter e dia di eleccion. Ami como pensionado no tin e problema ey.
Grandi tabata mi sorpresa cu riba dia 23 di november 2024 mi a ricibi un mail di Sra. Marjetie Lai-Ping Franzy Hsing, Allround Medewerker Gegevensverwerking di Censo Aruba cu ta bisa cu mi a wordo apunta como e di tercer miembro di e comision electoral di urna #43 na Colegio Laura Wernet- Paskel na Cadushi Largo. Segun e decision e siguiente personanan a wordo apunto como miembro di e urna electoral #43:
- Sra. Dulcela Laurina Jeanette Medora Hunt (Presidente)
- Sra. Brigida Hipólita Angela (segundo miembro)
- Sr. Leopoldo Rosario Henriquez (tercer miembro)
- Sra. Aislynn Alexandrine Geerman (prome reemplasante)
- Sra. Laura Bernarda Garcia Palacios (segunda reemplasante).
Den e mesun mail e personanan miembro di e urna electoral #43 a ricibi un invitacion pa participa na un merdia / anochi informativo tocante e organisacion di e dia di vota cu ta dia 6 di december 2024. Y tambe a ricibi e guia 2024 (Leidraad voor de voorzitters en leden van de stembureaus versie 2024) cu Titulo Sea informa, Scoge y Vota 2024 cu informacion con e votamento ta bay y cua miembro tin cua tarea e dia ey. Den un mail antes di Sra. Marjetie Lai-Ping Franzy Hsing di 2 di november 2024 a wordo puntra pa ya cuminsa pasa door di e guia pa haya sa kico e funcion y tareanan di cada miembro lo ta e dia di eleccion.
Ami door di mi entusiasmo mi a lesa e guia tres bes, ya cu mi ta di edad halto pa asina mi por hinca den mi cabes kico ta mi funcion y tareanan.
Mi a participa cu hopi interes na e dia merdia y anochi di 28 di november 2024 den Grand Ballroom na Marriott. Loke ta m’a ripara ta cu mas cu 80% di e personanan presente tabata femenino, cual no ta un reflexion di populacion di Aruba. Mi sa sigur cu e porcentahe hende femenino ta mas abao. Eynan mi a bin topa dos di nos miembronan di urna electoral #43 cu ta Sra. Aislynn Geerman y Sra. Laura Garcia Palacios. Sra. Aislynn Geerman a informa mi persona cu ta pe ta prome biaha cu e ta participa na e actividad asina y di mi banda mi a bisa Sra. Geerman cu pa mi tambe ta prome biaha. Lamentablemente ni e presidente di nos urna, Sra. Dulcel Hunt, y tampoco e segundo miembro, Sra. Brigida Angela, a presenta. Despues di un ora a bin na nos mesa un señora di e Conseho Electoral cu a entrega nos e T-shirts y a informa nos cu e no ta compronde di con Sra. Hunt ni Sra. Angela no a bini y cu tampoco nan no a informa e organisacion di nan ausencia. Nos a contesta cu ta falta di respet. Na final mi a pasa cerca e mesun señora ey pa puntr’e kico lo bay pasa awor cu Sra. Hunt ni e otro no a aparece. Anto e la conta mi cu e lo informa e Comision General di e urnanan pa tende kico lo wordo haci anto lo nan informa nos kico lo bay pasa.
Grandi tabata e sorpresa di lesa den un mail poco dia prome cu eleccion, riba 2 di december 2024, ricibi di Sra. Marjetie Lai-Ping Franzy Hsing di Censo cu e funcionnan di e miembronan a wordo cambia diripiente den e siguiente:
1. Sra. Dulcela Laurina Jeanette Medora Hunt (Presidente)
- Sra. Aislynn Alexandrine Geerman (segundo miembro)
- Sra. Melanie Josyanne Albertus (tercer miembro)
- Sr. Leopoldo Rosario Henriquez (prome reemplasante)
- Sra. Laura Bernarda Garcia Palacios (segunda reemplasante).
Mesora mi a manda un contesta pa mail pa Sra. Marjetie Lai-Ping Franzy Hsing di Censo pa puntra kico a pasa y di con tabata tin un cambio. Ya cu ningun motivacion of hustificacion a wordo presenta pa cu cambio aki. Mi a manda un mail cu mesun contenido pa cu Conseho General di Eleccion (Electorale Raad van Aruba), pa medio di e secretaria Sra. Sahaira Kelly. Di e ultimo ey mi no a ricibi te awe ningun contesta.
Pero mientrastanto Sra. Aislynn Geerman ta informa mi via WhatsApp cu prome cu e cambio a wordo comunica na nos, e la wordo yama pa informe cu su funcion a cambia. Sra. Geerman ta haya esaki straño tambe. Mi persona no a ricibi ningun telefon tocante mi cambio.
Dia 3 di december 2024 Sra. Marjetie Lai-Ping Franzy Hsing di Censo ta informa mi den un mail cu pa e proceso bay mas optimal nan a dicidi di haci e cambio a base di experticio. Di biaha mi a contesta Sra. Marjetie Lai-Ping Franzy Hsing di Censo back cu e unico experticio cu porta ta cu un persona ya den pasado a yega di funciona como miembro di un urna electoral. Y cu by the way esaki no ta experticio pero experiencia. Y mi a referi na Sra. Aislynn Geerman cu segun e cambio a bira miembro number 2 di e comision di e urna electoral #43 mientras cu e nunca yega di funciona como un miembro. Y tambe cu Sra. Hunt no aparece e dia informativo ni sikiera pa siña conoce nos. Y tambe cu diripiente un persona cu nunca a wordo menciona awor a tuma mi luga como di tres miembro di e urna electoral #43. Y mi a informa Sra. Marjetie Lai-Ping Franzy Hsing di Censo cu mi tin obhecion y cu mi no ta di acuerdo cu e cambio como cu mi a hinca bastante energia den esaki caba. Mi a informa Sra. Marjetie Lai-Ping Franzy Hsing di Censo cu si un ambtenaar tuma un decision e mester uza e principionan di “Algemene Beginselen van behoorlijk bestuur” pa informa esnan envolvi di con esaki a wordo tuma.
Awe dia 4 di december 2024 Sra. Marjetie Lai-Ping Franzy Hsing di Censo ta yama mi pa papia cu mi finalmente. Despues cu a informa mi cu no ta e a dicidi esaki, e la bisa mi kico mi ta bay haci. Den e combersacion telefonico e ta pone presion riba mi manera: “take it or leave it”, esta mi mester dicidi e ora ey pa asina nan por sigui. Mi informa Sra. Marjetie Lai-Ping Franzy Hsing di Censo claramente cu mi no ta acuerdo. Anto e ora y Sra. Marjetie Lai-Ping Franzy Hsing di Censo a tuma e decision di saca mi completo for di e lista di miembronan di urna #43.
Corda bon cu ami ta boluntario cu door di mi entusiasmo mi a pone mi mes disponibel pa contribui na algo bon pa Aruba, asina hinca energia y tempo den esaki, cumpliendo cu tur locual a pidi pa te na final hala mi un banda sin motibo valido. Esaki ta un trato di falta di respet y dignidad y den contexto di algo asina importante manera un eleccion, falta di seriedad y profesionalismo di ambtenaar.
Ta p’esey a base di loke a pasa, mi conclusion ta cu ningun di nos di Aruba mester para como boluntario na un urna electoral durante un eleccion, tanten ta haci y deshaci di hende sin motibo y hasta nombra hende den urna cu no ta tuma e trabao serio.
