Declaracion di Presidente Petro
Den weekend cu a pasa Presidente di Colombia, Petro a saca un comunicado den prensa di e intentonan di Fiscalia (Ministerio Publico Colombiano), cu ayudo di sectornan di narcotraficantenan y politiconan corupto, pa baha e presidente di Colombia, democraticamente eligi dor di pueblo. Petro ta haci apelacion na organisacionnan di derechonan humano, partidonan progresista y organisacionnan sindical di Colombia y di mundo henter pa presta atencion na su denuncia, cu Fiscalia di Colombia a suspende contra tur regla y sin rason e canciyer Leyva.
Alvaro Leyva ta un politico, hurista, economista, defensor di derechonan humano y diplomatico. Motibu duna dor di fiscal ta e contrato pa traha paspoortnan nobo. Pero segun esnan conoci di e situacion di Colombia ta e hecho cu pronto lo tin un bishita di un delegacion di huristanan di Conseho di Seguridad di UNO, kendenan mester ser bon atendi y pa ricibi informacionnan corecto ariba con e desaroyonan di e acuerdo di pas na Colombia di 2016 ta sigui. Fiscal no kier pa e delegacion ricibi informacionnan valioso y corecto di un specialista ariba Derechonan Humano.
Narcotraficante si mag duna contribucion pa campaña politico, sindicato no
Tambe ariba un investigacion contra e presidente di Colombia pa motibo di un contribucion di un Federacion Sindical pa e campaña politica di Petro. Agentenan di Fiscalia den forma bruto a haci incursionnan dentro di sindicatonan, a uza presion pa testigonan acusa e presidente, tur sin exito. Tin casonan cu pa partidonan derechista si ta wordo declara legal, pero pa e partido di Petro, mesun accion ta ser declara ilegal. Tin e caso, cu declaracionnan di un contribucion di un Narcotraficante, yama ñeñe, na e partido cu a nombra e fiscal, sin ningun investigacion, e caso ñeñe ta ser declara legal. Pues pa narcotraficante ta legal pa duna contribucion, pero sindicato progresista NO.
Petro, den su declaracion ta bisa cu e mester alerta mundo cu mafianan a coy poder den fiscalia y su lucha ta pa kibra e poder aki.
P’esey Presidente Petro a pidi e pueblo Colombiano pa ta alerta, cu mobilisacionnan masal di pueblo pa kita e poder mafioso y trece bek e decencia cu mester reina den Husticia na Colombia. Su partido Pacto Historico a yama demonstracionnan masal den tur e ciudadnan grandi na Colombia, diahuebs 8 di februari 2024.
Lawfare
E tema aki a bini dilanti den e caso aki contra Presidente Petro na Colombia y cual ta ser uza hopi contra politiconan progresista na mundo, pero mas special na Latino-America, unda ta uza husticia como herment politico pa elimina oponentenan politico na un momento oportuno. Pues un sorto di mecanismo cu ministerio publico, hunto cu prensa y oposicion ta manipula y formula casonan falso, basa ariba corupcion. Esakinan pa ilegalisa y prohibi lidernan progresista (iskierdista) pa participa den e proceso politico.
Lawfare ta un Soft Coup
Lawfare ta wordo yama tambe Soft Coup. Un coup (toma di poder) mas suave. Sigur si nos analisa e golpinan di estado na Latino America di e decadanan 50, 60, 70 y 80 di siglo pasa, unda cienmilnan o miyonnan di morto a cay.
Tin hopi casonan di Lawfare conoci den e siglo aki manera:
Actual presidente di Brazil, Lula , pa e no ta un candidato presidencial contra Jair Bolsonaro, na 2018, Fiscal na Brazil a trece acusacionnan falso y Lula mester a bay prison pa basta tempo. Nunca Lula a presenta dilanti di un Hues pa defende su caso. A lo largo Lula a sali liber di tur acusacion y despues a sali eligi como presidente di Brazil.
Caso di Evo Morales, kende a gana eleccion cu mas di 10% di bentaha ariba su contrincante, pero cu acusacionnan infunda di corupcion mester a bandona su pais y bay den exilio na Mexico pa salba su bida. Den e siguiente eleccion poco lunanan despues, su compañero di campaña, Luis Arce ta gana eleccion cu bentaha grandisimo.
E caso di Christina Kirchner, Ex-presidente di Argentina, kende a ser prohibi pa participa den eleccion pa presidente. Igualmente Ex-presidente di Ecuador Raphael Correa, kende a ser prohibi pa drenta Ecuador y mester a bay den exilio na Belgica.
Recien ta e caso di Pedro Castillo, e presidente Izkierdista, kende na 2021 a gana eleccion presidencial na Peru, pero na december 2022, a base di manipulacionnan di su vice-presidente Dina Baluarte y Fiscal(Procurador General) Benavides a ser baha como presidente y hinca den prison, sin cu Presidente Pedro Castillo a aparece dilanti di un Hues pa defende su caso. Benavides a ser nombra Fiscal interino na 2022, specialmente pa investiga Presidente Castillo. Na december 2023, Benavides a ser baha como fiscal pa motibonan di actonan coruptivo.
A pesar di manifestacionnan grandi y rechaso grandi di pueblo contra Baluarte, Pedro Castillo ta den prison ainda.
Asina tin mas casonan di Lawfare na Latino-America y na mundo.
Otro hecho conoci ta cu despues di analisa e casonan di lawfare, casi semper e mannan scur di USA ta meti. Igualmente manera tabata e casonan di e golpinan di estado di siglo pasa, den siglo 21, Merca no ta tolera presidentenan progresista na Latino-America.
Pues ora analisa e situacion na Colombia, e ta uno hopi serio, unda Pueblo a eligi un Presidente Iskierdista, pa caba cu tur actonan di bandides, caba cu bagamunderianan di politica derechista y trece un politica mas humano cu medidanan social na bienestar di full e pueblo Colombiano.
Mundo politica di derecha na Colombia, encabesa pa Fiscalia, yuda pa prensa derechista, no kier acepta e situacion nobo na Colombia. P’esey e intentonan di Lawfare contra Petro.
