Tur aña den cuadro di Dia di Prensa, mi ta custumbra di trece mi reflexion riba desafionan cu ta regarda e ehercicio liber di prensa na Aruba.
Masha poco actividad ta wordo organisa pa duna contenido y reconocimento na e trabou cu e gremio periodistico ta bin realisando cu hopi sacrificio pa garantisa y consolida e derecho di libertad di informacion y expresion. P’esey mi palabra di elogio ta bay pa mi colega Leo Vrolijk kende a percura pa 17 aña organisa su exposicion E Lens di Mi Wowonan cu patrocinio di RBC Bank en conexion cu Dia di Prensa.
Un aspecto importante cu mi kier delibera riba dje tin di haci cu e acceso y disponibilidad na fuentenan di informacion. Sin fuente di informacion y documentacion dificilmente
prensa no por eherce y cumpli cabalmente cu su responsabilidad di divulga informacion.
E fuente di informacion mester ta uno confiabel y digno di tur credibilidad. Entre mas cerca un fuente ta relaciona cu un echo of topico informativo concreto, mas credibilidad e tin. P’esey ta relevante cu e fuente di informacion mester ta accesibel pa prensa por haci su trabou di informa, y asina evita speculacion of mal informacion of fake news. Muy specialmente si e fuente di informacion ta un funcionario publico of semi-publico, ya sea director di departamento, empresa estatal, etc… nan disponibilidad pa duna informacion mester t’ey. E ta un deber ser y un compromiso cu nan tin cu nos comunidad.
Prensa liber ta un instrumento di comunidad. No solamente pa nan ta bon informa, sino pa canalisa y busca cierto contesta riba nan inkietudnan y preocupacionnan. Esaki a keda demostra durante e incertidumbre cu a reina den tempo di pandemia. Durante e temporada di cuarentena y distanciamento social pa causa di e Covid-19, cantidad di pregunta tabata drenta
den mi cel for di mi contactonan pa mi formula nan durante e inolvidabel conferencia di prensa virtual tur anochi. Y sigur mi no tabata un excepcion entre mi coleganan di prensa.
Durante mi actividad periodistico e acceso y disponibilidad na fuentenan di informacion tabata un problema constante. Mi por a ripara e mesun problema cerca mi coleganan. Esta e falta di disponibilidad na fuentenan di informacion confiable pa trece informacion di un forma responsabel. Nos ta conoce e trikinan di e fuentenan di informacion cu ta busca tur sorto di excuus pa evita prensa. E situacion aki ta uno asina frustrante cu ma yega di conoce persona cu hopi potencial y talento periodistico cu a renuncia di sigui traha den prensa pa motibo di e problema aki.
E presion y stress cu un miembro di prensa ta pasa aden ta uno pisa na momento cu por ehempel, e deadline pa cera e corant ta cerca, y ainda e no por a bin full cla cu su informacion. Mayoria di biaha e situacion aki ta debi na falta di declaracion clave cu por duna peso na e redactor su informacion. Vale la pena aclaria cu tin fuentenan di informacion “mediatico” cu ta desaroya cierto empatia cu e miembronan di prensa. Pa añas ma yega di cultiva algun fuentenan di informacion confiabel a base di un respet mutuo, locual tabata facilita mi trabou di informa nos comunidad.
Ta bon pa reitera cu no ta un fabor un fuente oficial ta haci ora cu nan ta duna cierto declaracion of entrevista na prensa. E ta un deber y compromiso como funcionario publico pa informa y duna cuenta regularmente di nan trabou na pueblo. Cantidad di scandal di corupcion nos por a evita si na tempo nan tabata wordo denuncia y divulga den prensa. Esaki den cuadro di integridad y transparencia den aparato gubernamental. E ta e manera con prensa por cumpli cabal y constitucionalmente cu su deber di denuncia y informa nos comunidad. E ta un derecho humano natural y inalienabel cu nos tur tin pa obtene informacion di un forma liber, confiabel y responsabel den un pais democratico.
Ma yega di atende hunto cu un grupo di colega un lectura organisa pa e compania estatal ELMAR en conexion cu Dia di Prensa. El a wordo duna pa e hurista y ex Rector di Universidad di Aruba, Mr. Glenn Thodé bou e nomber: “Medio, Etica y Derecho.” Ma yega di traha un compilacion di e lectura aki cu a keda publica den Bon Dia Aruba riba dia 5 di september 2016. Mi ta comparti abou e link di e publicacion menciona:
Periodistanan tin derecho na tur informacion y fuentenan sin restriccion
A pesar cu e charla interesante aki a tuma luga shete aña pasa tin puntonan clave of principionan cu ta regarda e actividad di prensa cu Mr. Thodé a trece dilanti y nan ta keda vigente keto bay. Un di nan ta referi cu nos legislacion ta garantisa e ehercicio liber di prensa. Igualmente dos aspecto relaciona cu mi topico central tin di haci cu e proteccion di e fuente periodistico. Como miembro di prensa bo tin derecho di no divulga bo fuente di informacion ora cu ta trata di cierto informacion
delicado duna di un forma confidencial. Pero di otro banda como prensa bo mester informa cu berdad. Kiermen bo no mester guli tur locual bo fuente ta duna bo, sin cu prome bo no ta evalua bon e informacion suministra pa bo fuente. Tin biaha e fuente mes por tin su propio interes, y como prensa eticamente bo no mester bira un instrumento di bo fuente di informacion.
Ya pa culmina durante e lectura menciona, Mr. Thodé a pone enfasis cu e miembronan di prensa ta gosa di e facultad di tin acceso na tur informacion, y esaki no por wordo nenga. Prensa tin e derecho di realisa e trabou ey pa comunidad, basa riba berdad, ya cu e ta un principio.
Finalmente pa tur mi coleganan di prensa den nos region y na Aruba: Feliz y reflexivo Dia di Prensa.
