E expectativa ta grandi den nos comunidad riba kende lo bira e feliz ganado di e Mini Mega Plus di 3 miyon 150 mil florin di Lotto pa Deporte cu ta hunga awe nochi. For di dia cu e sorteo aki su premio miyonario a subi kibrando e record di e premionan anterior, e expectativa den cada sorteo cu no ta produci ganado, ta bira mas grandi y pero e siguridad tambe.
Patrick Fortin di Fundacion Lotto pa Deporte a declara na Bon Dia Aruba cu pa henter nos comunidad ta e prome biaha cu lotto tin un jack pot asina grandi. Bayendo un poco den historia di e premionan grandi di Lotto pa Deporte, e premio mas grandi cu nos a conoce tabata 2 miyon 450 mil florin na 2010. Segun Sr. Fortin e premio miyonario di Mini Mega Plus cu ta hunga awe ta un “record jack pot cu Aruba ta conoce y cu nunca a yega di conoce ainda”.
“Pa Aruba esaki ta un suma hopi grandi!. E expectativa ta hopi grandi. Tur hende ta pendiente aworaki di e sorteo pa wak si e ta bira e proximo miyonario of kendenan ta bira e proximo miyonario.”
Bendemento di lotto y siguridad
E ta conseha pa tur hende cumpra su ticket tempran y evita asina e rijnan cu ta bay tin den anochi, pasobra tur hende ta subi caya pa busca nan Mini Mega of Mega Plus. Mirando cu nos ta papiando di un premio gordo nunca bisto na Aruba cu ta stimula e benta masivo di ticket den tur kiosco di Lotto pa Deporte rond di Aruba, e skema di siguridad di parti di nos autoridadnan competente a bira mas pisa.
Sr. Fortin a declara na e matutino aki cu un suma grandi asina e polis ta core mas atento cerca e bendedonan dor cu nan sa cu tin hopi movecion y nan ta tira un bista extra .
Cada bes cu e sorteo ta keda aden e motivacion pa sigui cumpra e lotto aki ta bira mas grandi den comunidad. “Mas grandi cu e suma bira mas grandi e interes ta bira. Pasobra bo no sa ki dia bo ta wak un suma atrobe asina.”
