“E ta un sospecha pero semper algo asina por pasa”, asina presidente di SIWA, Eric Henriquez a duna su prome reaccion na Bon Dia Aruba riba e sentencia di corte relaciona cu e caso sumario cu nan a entabla contra WEB NV pa evita mas cortamento di 12,6% di nan beneficio di salarial.

Con e miembronan di SIWA a tuma e sentencia aki? Henriquez a declara cu e sindicato tabatin un reunion general chikito cu nan a convoca di forma rapido ayera. Nan a trece e sentencia aki den nan reunion, caminda pa e miembronan a cay den “hopi mal tera,” el a bisa. E moral di e trahadonan di WEB ta hopi abao pero -segun presidente di SIWA- nan ta garantisa awa y coriente pa tur hende na Aruba

Presidente di SIWA no a bay mucho den detaye riba e sentencia. Nan a prefera pa bay analisa prome cu nan abogadonan kico tabata e motibonan di e hues su decision desfaborabel pa e sindicato. “Nos ta bay djis wak kico nos abogado tin cu bisa nos. Di eynan nos sa na unda nos ta para,” Eric Henrique a laga sa.

E no kier a referi si e sentencia aki ta duna espacio pa SIWA bin cu un tipo di apelacion contra dje. Nan a prefera di consulta nan abogadonan prome pa haya e guia necesario si por of no por apela e veredicto aki. “Actualmente mi no por bisa nada di esey ainda,” el a bisa.

Encuanto e punto esencia cu hues a basa su mes pa emiti su sentencia, esta cu interes general mester prevalece meymey di e crisis cu Aruba ta confronta actualmente, e ta un aspecto cu nan ta bay analisa cu nan abogadonan. Nan kier scucha for di nan con nan por interpreta esaki pa medio di un “idioma cu nos por compronde.”

E sentencia di hues no a resulta faborabel pa SIWA, pero si ta duna espacio naturalmente pa sinta cu gerencia di WEB N.V, pa evalua con lo por yega na un acuerdo riba cortamento di 12.6%. Presidente di SIWA a referi cu nunca e trahadonan a nenga di contribui di forma solidario, pero no impone riba nan di forma unilateral.

“Ningun momento nos a nenga di colabora, pero e parti unilateral y como el a wordo haci e no tabata faborece nos. Nos no tabata contento cu e manera aki,” el a expresa.

Sindicato SIWA ta dispuesto pa sinta na mesa cu gerencia di WEB N.V. Te hasta nan ta haya cu un parti di e sentencia di hues ta bisa pa habri espacio pa nan por sinta combersa. Pero SIWA kier pa banda di gerencia nan por ta habri un poco mas, na unda nan por duna loke e sindicalista a yama como “espacio real.” Un espacio unda hunto nan por yega y hunto nan por sali for di dje. Pero te ainda SIWA no sa nada di gerencia di WEB actualmente, tampoco despues di e sentencia di corte