Parlamentario Van Raak (SP):
Parlamentario Hulandes, miembro di partido SP y vocero di Asuntonan di Reino Hulandes Ronald van Raak tabata presente tambe na Aruba manera conoci pa e reunionnan di IPKO. E ta bisa cu e situacion actual cu Venezuela no ta uno cu tin di haber cu contrabanda, pero mas bien cu manera di hiba politica.
Via columna politiek.tpo.nl, parlamentario Van Raak a expresa tambe cu di locual e por a constata cu su bishita na Aruba e siman cu a pasa, cos no ta mustra mucho bon pa locual ta desaroyo di refineria di Aruba.
Aruba, Curaçao, y Bonaire tabata den noticia internacional e siman cu a pasa relaciona cu ceramento di frontera entre Venezuela y islanan ABC manera conoci. Aruba ta mas o menos 23 kilometer leu for di e costa di Venezuela. E argumento ta cu aparentemente e Venezolanonan lo mester tin un operacion grandi di producto y placa den contrabanda via e islanan, treciendo peliger na economia di e pais. “Pero Venezuela no tin mester di e islanan pa por caba cu nan economia, esey e gobierno mes ta haciendo riba su mes. E no ta trata di contrabanda, pero mas bien ta trata di politica mundial”, sr. van Raak ta comenta.
Merca cu Europa tin nan embargo contra hendenan importante y organisacionnan di estado na Venezuela, como contesta riba e situacion politico segun nan teribel cu ta andando den e pais. Awor Venezuela como reaccion a dicidi pa cera fronteranan y segun parlamentario Van Raak, e politica riba e islanan no lo wordo afecta hopi por medio di esaki, ni seguramente e politica di Merca of Europa. Pero esnan cu si lo wordo afecta ta hende pober cu por medio di e boycott di e pais bisiña grandi aki, no lo por haya fruta y cuminda barata mas. “Mi tabata na Aruba pa dialoga cu politiconan di otro paisnan den Reino. Eynan nos a papia tocante e boycott. Nos tabata kier a sa mas tambe tocante refineria di Aruba, cual na momentonan aki lo mester bay bao cargo di un compania Venezolano. Pero esey no ta mustra posibel.”
Politica local mundial
Sr. van Raak tin hopi aña como vocero di Asuntonan di Reino Hulandes den Tweede Kamer. “E ta un trabao hopi dificil tin biaha pasobra masha tiki hende na nos pais ta interesa den e islanan. Pero e politica riba e islanan tambe ta interesante, pasobra cu e problemanan local akinan hopi biaha ta conecta directamente cu politica mundial. Sigur e situacion entre Merca cu Venezuela.” E ta bisa cu Aruba, Curaçao y St. Maarten ta depende casi completamente di turismo, pero Venezuela ta nenga di paga debe na Insel Air por ehempel. E compania aereo cu e mayoria di vuelonan entre e islanan ta den problemanan financiero grandi pa motibo di esey. Curaçao tin un refineria cu compania Venezolano PDVSA ta huur. Door di e crisis na Venezuela, e futuro di e refineria aki ta mustra insigur segun e parlamentario Hulandes.
El a bishita e refineria di Aruba – unda na prome instante el a wordo prohibi pa no drenta – anto a constata mescos. “Mi ta sorprendi cu Aruba kier start up e refineria bieu, hunto cu compania Venezolano/Mercano Citgo. Aruba a drenta den un garantia riba balor di miyones caba, mientras cu e pais Venezuela tin basta aña cu hopi reto.” E parlamentario ta bisa cu varios politico na Aruba a garantisa su persona cu e proyecto aki di e refineria lo bay door a pesar di e crisis na Venezuela. “Pero esaki nos kier wak cu nos mesun wowonan.”
Refineria di Aruba ta un ‘junkyard’
Banda di dialogo cu politiconan durante reunionnan IPKO, e politiconan tambe ta haci varios bishita di trabao. Pa asina por papia cu mas hende y di e forma aki por compronde e problemanan mas miho segun sr. Van Raak. Manera nos a menciona, na prome instante e parlamentario no por a drenta refineria na Aruba. “Nos a puntra e compania Citgo pa un reunion, pero nan a nenga di duna esaki na e delegacion Hulandes. Nos a puntra gobierno di Aruba si nos tin permiso pa tira un bista na e refineria pero e bus a keda leu for di e tereno.” E parlamentario tabata hunto cu colega di VVD André Bosman, hunto cu periodista Juancho Werleman pa nan por a bay wak e tereno. “Nos no a wak ningun hende. Nos no a mira tampoco ningun señal cu e refineria a start bek. Nos a tuma nota si cu e tereno a termina na bira un junkyard.”
E parlamentario ta subraya cu aparentemente pa Reino ta mustra cu Aruba ta pasando den un aventura politico y financiero insigur, y ta purba tuma Hulanda haci cu weganan politico y cifranan robes. Sr. Van Raak: “Mientras cu Hulanda dentro di e Reino Hulandes ta responsabel pa un bon maneho y financia stabiel. Mas lamentabel ta cu na e manera aki nos ta extradita nos mes na Venezuela.”
