E sakeo ta un problema grave na St. Maarten, specificamente riba e parti Hulandes. E isla St. Maarten a keda destrui pa horcan Irma, mientras cu militarnan ta purba di recupera orden eynan, Mark Rutte , prome ministro di Hulanda a splica.

“E situacion ta grave,” el a bisa ora cu el a ser puntra tocante sakeo cu ta tumando lugar na St. Maarten. El a splica cu aeropuerto y puerto di St. Maarten cu ta den e parti Hulandes ta hopi destrui despues di horcan Irma, pero diaranson cu a pasa, autoridad a “habri e puerto y aeropuerto pa uso militar solamente.” “Nos ta purba di haci tur lo posibel pa duna ayuda na e area ey.”

Autoridadnan a bisa cu nan a manda militar y polis pa e area sur di e isla di Francia y Hulanda, mientras cu e prome ministro a declara cu e necesidad mas importante ta pa manda cuminda, awa y e restablecimento di orden na St. Maarten.

“Nos no lo bandona St. Maarten, nos a manda medicina, ekipo di higiena, canvas y tent pa region di Caribe.”

Ora cu “forsa arma yega na e zona afecta di St. Maarten, nan tin dos tarea. Prome tarea ta sigura cu tur hende por haya cuminda y awa, y e di dos tarea ta garantisa e seguridad riba e isla tambe,” Rutte a sigura.

“Tin hende riba caya cu arma di candela y cuchiu,” un testigo a declara na e corant di Hulanda, AD. E situacion ta grave. Ningun hende tin e mando y control awor.” Funcionarinano di Hulanda a confirma cu un persona a muri na St. Maarten, e parti Hulandes, despues cu Irma a toca e isla aki. Diabierna e horcan a pasa di un categoria 5 pa categoria 4, mientras e tabata yegando na Cuba y Florida, Merca.