Mama di baby di aña tin 15 y e tata ta mayor di edad. Esaki ta haci cu e ser masculino a comete un acto castigabel segun ley y como tal por wordo persigui cual ta wordo cuestiona. Otro aspecto cu ta wordo cuestiona ta e informacion cu nan ta casa mirando cu no por casa bou di edad di 16 aña ni cu conscientisacion di mayor na Aruba. A acera diferente instancia pa un bista den e situacion aki na Aruba.
Wit Gele Kruis
Monique Giel tienermoeder consulent di Wit Gele Kruis (WGK) a bisa cu ainda nan no a bishita e mama como cu ainda ta den preparacion despues cu aña a habri. E ta consciente cu e caso a hala atencion como e ta mama hoben y zowiezo e lo cay den e plan di guia cu ta enfoca riba mamanan entre 12 cu 19 aña. E enfoke ta bay mas tanto si riba mamanan te cu 17 aña como cu nan ta menor di edad.
Te cu aña pasa e fenomeno di “Lover Boy” a resalta mas cu esun di Sugar Daddy esta mucha muhe di 14 aña y guy den nan 20 aña, segun Sra. Giel. El a sigui bisa cu Mayornan mester ta mas envolvi cu yiu na un edad mas trempan y cuestiona amigo di nan yiu, e rol di mayor mester ta mas fuerte. No mester warda te ora cu scol papia cu e muchanan, pasobra esaki ta haci cu e muchanan ta siña tur cos (robes) riba caya y hopi bes ta tene relacion na edad hoben sin tabata kier
Cifra
Pa locual ta trata e cifranan di embaraso hubenil di aña 2015, ainda Sra. Giel no a ricibi e resultado di e ultimo luna pues te cu 3 november e tin 81 mama registra. Segun e ta splica e cantidad aki ta hopi abou teniendo na cuenta cu aña 2014 a cera cu 126 mama hoben. “Mi ta kere cu e aña 2015 no ta yega 100 mama hoben como cu e lunanan te cu november sa ta e lunanan cu cifra mas halto na Aruba.”
Segun Sra. Giel e ta kere cu tur e trabou di conscientisacion cu ta wordo haci pa e diferente instancianan ta yuda. Charlanan interactivo ta wordo teni adapta na edad di e muchanan y hopi visual cual ta haci cu cu e imagennan ta wordo imprimi practicamente den nan celebro. Nan ta mira exactamente kico a pasa ora cu haya yiu y tur consecuencia rond di esaki.
E grupo cu ta wordo considera mama hoben ta di 12 pa 19 aña, sinembargo e grupo di mamanan di 14 y 15 aña ta e grupo mas grandi. Segun Sra. Giel ta bisa ta tristo, pero mayoria di e mamanan aki ta cuminsa cu acto sexual cu 12 aña caba, pues 5de of 6de klas, mientras cu nan no ni sa con nan menstruacion ta hinca den otro.
Legal
“WGK ta ricibi tur detaye di ambos mayor y baby ora di inscribi un baby pero no por pasa e informacion aki na instancianan legal. Esaki ta keda den man di mayor di e mama hoben of e mama hoben. WGK por mustra nan si riba nan derecho y e caminda cu nan por cana.”
El a agrega bisando cu lamentablemente mayoria mucha di 14 aña cu haya baby tin tata riba 19 cual tta un adulto y ta haci e hecho castigabel, pero pa motibo di “beroepsgeheim”, no por haci nada legal cu e informacion. Sra. Giel a remarca cu e articulo publica recientemente di Sra. Sharin Luydens di Censo ta exactamente con e ley ta hinca den otro y WGK ta na altura di dje
Voogd di e baby
Ora un mucha haya un yiu e no por ta voogd di e baby, mayoria biaha ta e mama di e mama hoben ta bira e voogd y den caso cu no por ta wak e netwerk. Voogdijraad por splica mas amplio riba esey. Ora e mama hoben bira mayor di edad y e kier voogd di su yiu e mester manda un bezoekschrift y asina cana e proceso cu no ta mucho facil pa cambia e voogd di e mucha.
Den corto Sra. Giel a resumi bisando cu a pesar cu e cifranan di embaraso hubenil ta bahando ideal ta pa e cifra ta cero, pero menos cu ta posibel ta locual cu ta e meta.
Ministerio Publico
Opinion cu nos a ricibi for di Ministerio publico ta cu tene relacion sexual cu un menor di edad ta castigabel, y e persona por wordo persigui hasta si e menor no entrega keho. Esaki ta wordo mira como abuso sexual y segun Ministerio Publico frecuentemente ta bin casonan dilanti di corte pa esaki. Segun Ministerio Publico a compronde di Censo, ta cu e pareha lo kier casa.
Famia Planea
Coordinador di Famia Planea Wendy Biesum a splica Bon Dia Aruba cu generalmente nan no ta topa cu mayornan di cual uno ta menor di edad y e otro mayor di edad. SI ta e caso cu e grupo cu ta acerca Famia Planea a conoce un aumento cual ta haya positivo como cu e ta mustra cu mas persona ta consciente di e riesgo di tene relacion sexual no protegi y kier haci algo pa esey. “No ta kita cu de bes en cuando parehanan hoben ta bin hunto inscribi of mayornan tambe ta trece nan yiu inscribi. Mayornan hopi biaha no ta di acuerdo y ta hay’e un situacion fastioso pero ta prefera trece nan yiu hoben como cu nan ta consciente di e consecuencia.” A puntra Sra. Biesum ki ta e edad di mas hoben cu nan a yega di atende cun’e na Famia Planea, el a bisa cu e edad di mas abou ta 13 aña. El a enfatisa cu semper tin profesional cu ta papia cu nan y conscientisa nan cu e riesgo di embaraso hubenil ta keda.
Hospital
Reaccion cu nos a ricibi for di Hospital ta cu nan no tin un reaccion pa loke ta e situacion di e mama hoben cu a haya baby di aña, nan ta yuda e mama y a keda na e mama ki informacion adicional e kier a trece dilanti den comunidad. Ta consciente si cu e diferencia di edad a causa hopi reaccion den comunidad sinembargo ningun hende a haci reclamo directamente na hospital den e caso aki.
