ORANJESTAD – Manera a duna di conoce dia 18 di januari pasa, departamento di Polis y Departamento di Obra Publico (DOW) a cera e paso na e monumento cu ta hopi turistico di ‘Bushiribana Ruins’. Esaki pa motibo cu na entrada di e luga, un parti di e muraya riba e porta a kibra y a haci un scheur. Na e momentonan ey a pidi tur operadornan turistico pa no laga turista drenta, pa motibo di e risico di e luga.
Bon Dia Aruba a yega na e luga pa constata con e monumento ta na e momentonan aki, si e companianan concerni a cuminsa cu e trabounan di mantenemento, y loke a haya ta cu e mayoria di turistanan, cu ta yega hunto cu e companianan operador di tour pa conoce e antiguo mina di oro, ta subi te parti di ariba pa explora e luga y saca potretnan, pero nan no sa e sorto di risico cu ta coriendo den e luga.
Departamento di Obra Publico a pone varios baricada rond di e porta, pero e baricada manera e potretnan ta mustra a keda di un banda. Algun hende a pone nan di otro banda pa por drenta den e luga, aunke no tin ningun otro tipo di advertencia cu e turista por wak pa sa cu e monumento, cu tin basta aña caba, tin hopi risico y por trece consecuencianan lamentabel.
Di mesun manera, e departamento di redaccion di Bon Dia Aruba a yama DOW pa haya informacion di con e trabounan ta bayendo, mirando cu e baricada tin basta tempo eynan, of si nan por duna un splicacion di loke ta bay haci pa mantene e monumento un tiki mas seguro. Pero nan a contesta cu na e momento ey, ningun persona por ofrece declaracion di e caso aki. Bon Dia Aruba lo keda pendiente riba s contesta.
