E grupo cu ta bisa di tin e autoridad pa bira e siguiente directiva di Partido Democracia Real (PDR) a haci un peticion pa esaki na Camara di Comercio siman pasa. Ta spera un contesta e siman aki pero segun Andin Bikker, Camara di Comercio a inclina pa e grupo aki no haci e peticion anto pa cana e caminda di corte.

Sr. Bikker: “Mi kier coregi pues cu PDR no tin un directiva nobo. E directiva cu tin ta esun inscribi na Camara di Comercio cu ta nos.”

Segun e grupo nobo, PDR ta consisti di 29 candidato di cual dies di nan – incluyendo Bikker – a ricibi un carta indicando cu nan a viola articulo 5 inciso 8, asina terminando nan miembresia. Un miembro entrega su retiro desde 2013 y manera cu nos a informa caba, esaki ta haci cu ta keda 18 candidato cu tin derecho di voto cu necesidad di 10 persona pa forma un quorum.

Aworaki pues tin un aplicacion for di e grupo aki segun sr. Bikker – basa riba un reunion cu Bikker ta enfatisa cu ta uno iregular – cu a haci un peticion na Camara di Comercio pa inscribi nan como directiva. Pero despues di reuni cu Camara di Comercio siman pasa, sr. Bikker ta bisa: “Camara di Comercio a inclina pa nan (e grupo) no bay inscribi e peticion eynan anto cu nan lo mester bay corte.”

Bon Dia Aruba no a logra haya un reaccion for di Camara di Comercio riba esaki. Pero segun sr.Bikker, Camara di Comercio a bisa cu nan lo mester bay pone esaki por escrito pa comunica esaki na tur partido den transcurso di e siman aki. “Nos ta spera den tur trankilidad y duna espacio na Camara di Comercio pa formula su punto di bista anto tur hende lo sa unda nan ta para y ki derecho nan tin.”

Pues esun cu no ta di acuerdo cu decision di Camara di Comercio mester bay evalua kico lo tin cu haci despues: si ta laga esaki te eynan of ta bay corte. “Den mi concepto manera cu mi a bisa publicamente caba, nan no ta miembro. Un persona cu no ta miembro no por tuma decision di un organisacion. Mescos cu AVP ta henteramente liga na e famia fundado di Eman, y MEP na e famia fundado cual ta famia di Betico Croes, indudablemente Democracia Real ta liga na mi persona.”

Comision buena boluntad
E ta bisa cu e grupo di persona aki apenas a aparece riba lista eleccion pasa y tin otronan cu pa hopi aña nan no a wak nan ocupa den e partido. E ta bay wak si por institui un comision di ‘buena boluntad’ pa acerca e grupo y Alonso Tromp. “Con cu bay bin apenas un par di luna pasa nos tabata comparti e mesun opinion. Ta di lamenta cu aworaki nan mester a bay na e extremo aki. En todo caso den mi banda mi ta habri pa dialogo cu nan pa cera e capitulo aki.”

Sugerencia pa formula nobo
Despues di resultado di eleccion di 2013, sr. Bikker a participa na e partido PDR cu e no por keda cada bes carga e partido financieramente ora di eleccion. Tres biaha caba a bay eleccion y keda pega na un asiento.”Ta ami ta e votegetter, ami ta carga e partido financieramente y esun tur ora den prensa etc. Na 2013 caba mi a bisa nan cu nos mester un formula nobo pasobra asina ki nos no por bay mas.”

Sr. Bikker a bisa cu for di e tempo ey caba tur sostenedo di e partido tabata di acuerdo anto a compronde pakico a bini cu e sugerencia. “Nos tabata buscando un alternativa. Nos tabata tin lunanan bayendo den e direccion akinan. Otmar Oduber a auncia cu e tabata di retira como minister den 2016 anto akinan a presenta un oportunidad unda cu Alonso Tromp ta e prome cu a reuni cu ne..”

Otmar Oduber no a retira na maart 2016 manera cu tabata indica cu lo pasa, pero den november 2016 ora cu el a retira oficialmente, a reactiva e idea. “No ta un cos cu a sali out of the blue. Esaki tabata un discusion riba un formula nobo desde 2013 caba pa uni forsa cu sr. Oduber.” Sr. Bikker ta enfatisa cu Alonso Tromp ta netamente esun cu a inicia tur e dialogonan cu sr. Oduber pa despues cuminsa cu e discusion aki pasobra no a haya siguransa riba un puesto.

Comentario di Alonso Tromp 
Sr. Alonso Tromp ta bisa cu Camara di Comercio a scucha nan banda anto nan ta wardando riba nan respuesta respectivamente. Sr. Tromp no por a divulga nada na prensa manera cu nan a priminti na Camara di Comercio tanten cu no tin e resultadonan di e evaluacion. “Pero cos ta mustra cu ta bayendo hopi bon.”, e ta comenta.

Sr. Tromp a subraya tambe cu: “Nos mester trata cu e cos aki profesionalmente manera cu statuto ta prescribi. Nos no ta haciendo ningun chansa of wega akinan. Nos ta un grupo serio cu si kier sigui cu e partido. PDR ta un asociacion cual ta di e miembronan. E no ta un fundacion of un eenmanszaak.”