E conflico entre e operado di e waf di Barcadara, Astec, y aduna pa cu e siguridad riba waf, no ta soluciona ainda.
Esaki Atia ta bisa despues un reunion diabierna pasa. E organisacion aki di dunadonan di trabou a entama un caso siman pasa y te ainda esaki lo tuma luga diaranson den e caso e partidonan no ta yega na un solucion. Segun Atia nan ta haya te diamars atardi pa yega na un solucion.
Aki bou por lesa e relato oficial di Atia:
Atia a sinta na mesa cu partidonan envolvi
Diabierna merdia ATIA y abogado Maura Brown, representando ATIA, a sinta na mesa cu directie di ASTEC, APA, Directie Scheepvaart, Douane, SADA y abogado Chris Lejuez, representando SADA, pa purba yega na un solucion na e desacuerdo riba e regla di seguridad prome cu bai corte. E acuerdo pa sinta na mesa tabata condiciona na douane cooperando pa habri e waf na Barcadera di inmediato pa asina reanuda trabou y evita cu mas daño wordo hasi na comercio y economia di Aruba.
Lamentablemente no a yega na un solucion diabierna atardi durante e reunion na ATIA. Na final di e reunion a wordo acorda cu partidonan tin te cu diamars atardi pa yega na un solucion. Sino lo sigui cu e caso den corte diaranson mainta. ATIA di su parti, los di esaki, lo sigi cu un “bodemprocedure” pa asina claim e schadevergoeding di e daño cometi na comercio door di e accion aki.
ATIA representando su miembronan y comercio di Aruba en general ta haya inaceptabel cu ta bai over na accionnan asina sin cu purba sinta na mesa prome pa yega na un solucion. E trabounan na waf ya tabata atrasa door di e dianan di fiesta di e siman anterior. E accion aki no ta yuda e situacion y ta añadi mas retraso. Bienestar di pais Aruba mester ta na prome luga, mirando cu Aruba ta depende pa mas cu 95% di importacion di productonan di exterior. ATIA lo sigi e situacion den e proximo dianan di serca y ta spera cu partidonan envolvi por haya otro na mesa prome cu diamars atardi.
