Bista riba un ciudadano su situacion actual pega na pais bisiña
Despues di a tuma nota di e noticia cu pasaheronan no por a regresa Aruba despues di nan estadia na nos pais bisiña Venezuela, nos a tuma contacto cu un persona cu actualmente ta pega na Valencia hunto cu familiarnan. Mientras e persona ta sconde su telefon den publico pa informa nos di su situacion, haya un vuelo pa yega Aruba via otro pais ta mustra di ta masha dificil.
Manera prome minister Evelyn Wever-Croes a anuncia caba den ultimo dianan, aunke cu e frontera ta cera entre Venezuela y islanan ABC, ainda ta posibel pa subi un vuelo directo di Aruba na direccion di Venezuela. E dificultad ta keda na con pa regresa na Aruba bek. E prome minister a conseha esunnan cu ta pega pa tuma un vuelo via otro pais manera Republica Dominicana, Panama of Colombia cu lo por conecta cu un vuelo pa Aruba. Manera ta conoci a cera e frontera pa 72 ora un bes mas.
E reto pa e solucion aki ta keda cu vuelonan via otro destinacion ta hopi mas caro pa yega Aruba bek. Nos pais bisiña ta un di e paisnan cu ta mas accesibel financieramente pa pasaheronan. Pues e situacion actual ta un unda pasaheronan tin cu core rond manera kip zonder kop pa asina haya un vuelo cu lo por acomoda nan pa regresa nos pais bek.
Aunke anteriormente prome minister a duna ehempel di Santo Domingo como un vuelo cu lo por conecta sin haci mucho dolor na cartera, segun nos a wordo informa pa e persona pega na Valencia, esaki no ta un opcion na e ciudad aki. E otro vuelonan cu ta conecta sea via Colombia of Panama actualmente ta fuera di alcance di e persona. Ta asina cu e persona a informa nos cu e lo purba yega na Caracas pa asina tuma e vuelo pa bay Republica Dominicana y djey bula bin Aruba.
Nos tin di subraya cu e situacion na Venezuela manera ta conoci ta tenso, pasobra e persona cu nos ta mantene contacto cu ne no tin acceso regular na internet. Te hasta ora e por uza telefon mester percura pa no mustra esaki mucho den areanan publico unda lo por core riesgo cu e telefon lo wordo horta.
Despues di a informa e persona cu e ta posibel pa tuma contacto cu embahada di Reino na Venezuela pa asina nan asisti den tramita vuelonan pa otro pais, e persona a yama embahada pa asina purba haya asistencia. Esaki despues cu prome minister a splica cu ta posibel pa pidi asistencia den e tramite aki, aunke no por ofrece ningun ayudo financiero.
E persona a informa nos cu e embahada cu el a yama no tabata na altura di e situacion y cu ‘nan no a ricibi nada oficial ainda’. Staciona na Valencia, el a conta nos via medionan electronico cu e embahada a recomend’e pa purba check cu agencianan di biahe.
Pero despues di par di ora a tuma contacto cu otro embahada cu si tabata na altura di e situacion y a pidi e persona copianan di nan documento di biahe pa asina haya un manera di yuda nan. E embahada aki segun e persona a splik’e cu nan ta na altura di cuanto persona Hulandes ta pega na Venezuela.
Ayera nos redaccion tabatin un entrevista plania cu Edwin Abath, director di Departamento di Relacionnan Exterior. Despues di a warda pa e director sali for di su palabracionnan cu consul di Venezuela na Aruba, nos a wordo informa cu lo mester pidi un cita di nobo mirando e situacion actual.
Nos a haya impresion cu palabracionnan tabata tenso. P’esey nos lo por compronde. Sinembargo tin di remarca cu acceso na informacion den un situacion tenso asina lo mester bay di manera mas habri mirando cu ta trata kinan centralmente di hende cu ta den situacion dificil.
Nos lo sigui e desaroyonan di e situacion na Venezuela di cerca via nos contactonan na e pais y lo spera cu pronto e personanan cu ta pega na nos pais bisiña haya nan manera pa bin bek Aruba.
