Situacion na Malmok preserva por lo pronto

Dialuna mainta corte a duna veredicto den dos caso di cu Zissu properties a inicia. Un caso LAR contra minister encarga cu Salud Alex Schwengle y un caso sumario contra Gobierno di Aruba. Den ambos caso hues a bisa cu e no ta admisibel.

“Zissu a cuminsa proceduranan di LAR contra di e minister encarga cu Salud responsabel pa duna e permisonan di trabou. Den e caso ey Zissu a purba di haya un autorisacion pa opera e hotel sea permanente of temporalmente pa nan por cuminsa operacion. Esey tabata e base di nan peticion y p’esey nan a cuminsa e caso contra di e minister, segun abogado Lincoln Gomez ta splica. Tambe tin e otro caso cu nan a cuminsa contra pais Aruba. Den un caso civil, nan a purba pa corte ordena gobierno pa trata nan como si fuera nan tin un permiso, pues e obhetivo di e casonan tabata pa nan cuminsa operacion. Den e sentencia di dialuna mainta 14 di maart corte a bisa cu nan ta “niet ontvankelijk” pues no admisibel, y cu e caminda di LAR cu nan a cana y manera cu a cana esey no tabata e manera corecto. Por lo tanto corte lo no por yega na honra nan peticionnan, el a agrega.

Tabatin dos grupo, preserva Malmok y tambe e grupo di famia Harms cu a interveni den e caso pues cu a presenta  na corte como  e tercer partido di interes  y tambe a presenta argumentonan contra di e peticion contra Zissu. Cu e decision aki gobierno y e tercer partido di interes a keda satisfecho cu e sentencia.

Kico t’ey pasa awo

Locual cu esaki (e decision di hues) kiermen awo segun Sr. Gomez ta: “Si mira henter e situacion no kiermen mucho, e situacion cu tabata aden prome cu e sentencia no ta mucho diferente cu e situacion cu ta eherce awo despues di e sentencia, pues pa Zissu den todo caso. Otro siman 22 di maart, na Corte Superior lo tin e apelacion di e corte sumario cu a haya e sentencia dia 13 di januari cual tabata entre Preserva Malmok, Zissu y Gobierno. Un of dos luna despues lo tin un sentencia riba esey.

Nos a tuma contacto cu e propietarionan sinembargo nan a indica di no ta cla pa duna un reaccion ainda.

Inicio casonan den corte

Desde november 2015 e compania/ propiedad Ocean Z a haci publicacion riba diferente website cu nan tin un hotel di 13 camber (cama y desayuno). Tambe nan a publica informacion di posibilidad pa haci fiesta entre otro riba e propiedad. Algo cu a lanta hopi reaccion di grupo di habitantenan. Locual cu e propietario Eva Zissu a duna di reaccion riba esaki ta cu nan no tabatin nada di sconde y tabata mas bien ansioso pa cuminsa opera. E propietarionan a haya permiso pa construccion di un cas den un area residencia, sinembargo lo a “cambia” di idea y kier a bin cu un hotel cual a wordo construi tambe sin permiso pa haci esaki.

Terenonan operando riba erfpacht

Segun informacion obteni for di Kadaster, e terenonan riba e strip di Malmok tur ta erfpacht. Bon Dia Aruba a logra haya algun di e edificionan unda cu ta operando como hotel of apartamento, y a haya informacion cu ta trata di terenonan erfpacht.

Segun informacion obteni for di e abogado J. Croes cu ta representa Ocean Z, tin riba 20 edificio den e bario cu ta opera como comercial sin e permisonan pa esaki. Informacion cu nan tambe a ricibi for di Kadaster y DIP. E informacion aki nan a presenta na corte tambe mirando e situacion cu Ocean Z ta canando caminda pa haya permiso.

Segun abogado Sra. Croes, ta mustra cu hues no a tene esaki na consideracion y no ta cla tampoco kico lo wordo haci den henter e situacionnan di permiso di e otro edificionan cu si ta operando. Sra. Croes a bisa cu nan a wordo informa cu antes gobierno no tabata stricto, y no tabata controla riba esaki manera debe ser, y cu awo si ta e caso cu tin miho control tumando luga.