E dia e yega cu nos a haya e prome caso di Coronavirus, sigui pa algun mas. Mester bisa cu gobierno a cuminsa inmediatamente cu varios medida, y a mehora tambe comunicacion na publico en general. A tuma e decision cu ta cera frontera pa trafico aereo, loke tin como consecuencia cu e fluho normal di bishitante a yega na un paro completo. E medida ta di comprende, pero e consecuencianan ta mas grave cu hopi di nos ta realisa actualmente.

E ta un problema grandi na resto di mundo y specialmente na e pais di referencia pa nos, cu ta Merca. Gran mayoria di nos turistanan ta bin di e pais aki, y mes importante, e ta nos partnernan comercial principal. Y aki ta unda nos ta señala un punto negativo den tur e anuncionan cu nos a mira, cu nos no por comprende. Esey ta e anuncio di director di Douane, cu ta descontinua servicio normal y ta duna solamente prioridad na mercancia cu ta di importancia pa asunto medico y articulo di prome necesidad. Señores, nos ta bibando riba un isla unda e unico cos cu ta drenta gratis ta e aire cu naturalesa mes ta trece. Por lo demas, tur cos cu nos ta usa o come, mester bin di exterior. Ta zona masha bunita pa decreta un decision asina, cu de paso no ta cuadra cu loke gobierno a anuncia, segun nos opinion, pero kico mester sucede cu tur e otro mercancia cu Douane ta ‘decreta’ di ta di menos importancia? Laga tur cos drumi den bodega, pa ken paga despues?

Mientras cu den sector priva ta haci un esfuerzo grandi pa continua trabao, y esey a pesar di e caida grandi di demanda pa hopi negoshi, cu un payroll pa cumpli cune, kico gobierno, y den e caso particular aki, Douane ta haci pa continua trabao mas tanto posible, pa no stroba e economia aki cu di mes caba lo haya golpi grandi? Mescos den otro pais tambe aki ta scucha e yamado pa mas tanto posible continua trabao for di distancia, segun cu e posibilidadnan tecnico ta permiti. Como medio di comunicacion ta esey nos ta purba, na nos manera, pa limita e posibilidad di contagio na pia di trabao. Pero, mester ta posible tambe pa analisa e posibilidadnan pa e instancianan gubernamental continua trabao mas tanto posible, pa limita lo minimo operacion economico. E situacion actual no ta duna pa organisa un vakantie extra pa e empleado publico, pero pa haci tur cos cu por yuda pa mantene nos pais moviendo. Nos no ta haya e impresion ey di e señalnan aki.

Y no ta pornada nos ta trece esaki dilanti. Na e momento aki nos por ripara cu e situacion na nos isla tin algun elemento negativo grandi, cu nos no por remedia awor pero lo mester atende lo mihor posible mientras e crisis aki ta dura. Por ehemplo: e cantidad di hende cu ta emplea via uitzendbureau o contratista, cu a perde trabao den un solo tiro awor cu e hotelnan no tin ni trabao pa nan personal fiho, corda pa e otronan. Di nochi pa mainta nan a keda sin trabao y sin entrada. Y e problema no ta keda limita na e empleadonan temporal, pasobra tambe pa e personal permanente por bin medida empresarial pa por tene cabes riba awa como compania. Hopi empresa, no den turismo so sino den tur otro, por mira un caida considerable den demanda, y e pregunta pa nan tur ta surgi con nan ta bay sobrevivi, si e crisis mundial aki continua pa algun tempo mas. Y cu esey ta probable, nos por destila for di e situacion na Merca y Europa, cu no ta parce di lo sali for di gara di e pandemia aki den cuestion di siman. Ya caba ta cancelando evento cu mester tuma lugar e verano aki, y na varios pais ta considera e aña escolar aki como uno perdi. Nos autoridadnan no a yega na e conclusion ey ainda, pero nos no sa kico nos tin nos dilanti den e proximo siman y lunanan.

Otro problema cu tambe nos lo mester maneha na un manera practico, ta e presencia di miles di persona indocumenta, cu tambe ta den e promenan pa perde trabao. Ora nan contrae e virus aki, ta imposible y no practico tampoco, pa nenga nan tratamento medico pasobra bo no por combati e tipo di enfermedad aki si hende ta sconde nan situacion. Pa tratado internacional cada gobierno ta responsable pa esnan cu ta dentro di su teritorio, legal o ilegal, y mester percura pa cuido medico. Si ta berdad cu nos tin entre 10 pa 20 mil persona indocumenta aki, ta bira ora pa dirigi palabra na nan tambe, pa bon di nos tur.

Finalmente, tin golpi duro na caminda pa situacion di gobierno tambe. No por keda sin reacciona riba e situacion poco envidiable aki, pero awor nos por mira kico ta pasa si nunca ‘a traha dam pa warda awa’. Nos tin tres decada di gobernacion cu tambe ta ‘biba di paycheck pa paycheck’ y no tin ningun reserva. Den e situacion aki, trata di rescata lo maximo di nos economia no ta un fabor, sino un deber.