Segun cifra di Unicef na 2018 lo por muri 280 mil mucha pa causa di hamber y falta di nutricion na Venezuela. Pa yuda mengua e necesidad aki fundacion VeneAruba Solidaria ta organisando e di dos caminata familiar ‘Unidos por los niños de Venezuela’ cu lo tuma luga diadomingo awor pa 4:30 p.m. saliendo for di Plasa Simon Bolivar.

“E cifra aki ta alarmante. P’esey nos preocupacion ta esun di yuda e muchanan den mas necesidad”, asina Ursula Boom Peralta kende ta miembro di e fundacion aki a declara na Bon Dia Aruba.

E fundacion aki tin tres luna di existencia oficialmente. Sinembargo prome cu el a bira un fundacion, ya caba nan tabatin 3 aña trahado pa atende cu e necesidad di e Venezolanonan residencia na Aruba y esunnan cu ta bibando na Venezuela mes.
Mas tanto e necesidadnan di esunnan cu ta na Aruba caba tin di haber cu nan status legal y falta di trabou. Aunke e fundacion aki ta consciente cu riba e parti di ilegalidad nan no por yuda nan. Pero si pa atende cu algun otro necesidad basico, manera falta di cuminda y te hasta e posibilidad pa nan por haya trabou.

Necesidad y censo
Te ainda nan no tin un cifra oficial di e Venezolanonan cu actualmente ta na Aruba den mal situacion, ya sea laboral y/of ilegalidad. Nan ta trahando riba un inventarisacion of censo cu por refleha e situacion aki.

E fundacion aki ta trahando conhuntamente cu Cruz Cora Aruba, ya cu no obstante cu nan no tin un cifra exacto, e cantidad di Venezolano den necesidad ta grandi. Nan a cuminsa cu e censo aki, pero e no ta un trabou facil, ya cu mayoria di nan ainda nan status legal no ta defini. E hendenan aki ta masha reserva pa duna nan datonan. P’esey e ta prefera di abstene su mes di duna cifra, te ora cu e censo aki lo bin cla.

Pero si nan a identifica cu algun di nan necesidad mas prioritario cu ta esun tin haber cu nan situacion di ilegalidad. Tambe hopi di nan no tin trabou. Otro necesidad cu nan a yega di atende hunto cu Cruz Cora tin di haber cu e hendenan aki no tin seguro medico. Esaki ta un situacion alarmante, ya cu hopi di nan ta bira malo y tambe tin hende muhe na estado. “E situacion di salud ta un necesidad primordial”, el a bisa.

E fundacion a institui un comision of grupo caminda nan miembronan ta trahando riba tereno di e derechonan humano. Nan ta representante di e derechonan humano di e Venezolanonan cu a bin busca un miho calidad di bida na Aruba, debi na crisis humanitario cu nan pais natal ta pasando aden.

Nan ta percura pa e derechonan humano aki ta wordo salvaguardia, muy particularmente ora cu nan ta keda deteni pa nan condicion di ilegalidad riba nos isla. Sinembargo e meta central di e fundacion aki ta humanitario pa yuda esunnan cu tin mas mester na Venezuela y na Aruba. E crisis humanitario aki ta inclui e falta di remedi y falta di productonan medico na Venezuela.

“Tin hopi mucha riba caya cu nan ta pasando hamber”

Tur recurso of ayudo ta wordo canalisa pa medio di e fundacion aki. Awor cu e embargo di e gobierno Venezolano contra pais Aruba a wordo lanta, nan a cuminsa manda bek algun ayudo den forma di remedi, paña, pamper y otro articulonan basico.

Durante e periodo cu e frontera di Venezuela tabata cera pa Aruba, e miembronan di e fundacion tabata biaha personalmente cu maleta carga cu diferente tipo di ayudo pa Venezuela via otro pais. Igualmente e fondo cash cu ta drenta via e fundacion aki, nan ta canalisa cu otro fundacion responsabel na Venezuela, tanto na estado Zulia, Falcon y Valencia.

Nan ta traha cu fundacionnan pa duna ayudo na e hendenan Venezolano cu mas tin mester. “Nos ta consciente di e problema cu ta existi na Venezuela y e crisis humanitario cu nan tin ta grandi.” E ta haya cu e muchanan ta esunnan mas vulnerabel y tambe mas afecta cu e crisis humanitario aki. Tin hopi mucha riba caya cu nan ta pasando hamber.

Caminata
P’esey e fundacion ta organisa actividadnan pa recauda fondonan pa atende cu e necesidadnan aki.
Un di nan ta e caminata di 4.5 km cu ta cuminsa y termina riba plasa Simon Bolivar diadomingo awor. Nan ta pidiendo un contribucion boluntario pa participante. E suma aki ta inclui un T-shirt di e caminata y bebidanan. Na final nan lo entrega varios premio na e hendenan cu a participa.

Sra. Boom Peralta a expresa su satisfaccion pa e feedback cu nan ta bin hayando di personanan interesa pa participa den e caminata aki. Nan expectativa ta halto y nan ta spera cu e biaha aki e caminata lo bira un exito tambe. Aña pasa nan a registra un participacion di casi 800 persona riba plasa Simon Bolivar. Nan meta ta esun di supera e cantidad di participante e aña aki. E aña pasa nan a yuda e Cruz Berde na Venezuela cu a brinda nan ayudo boluntario pa atende cu e victimanan di e protesta.

Na final e ta formula un invitacion general, no solamente pa e Venezolanonan residencia na Aruba sino pa nos comunidad den general pa mustra nan solidaridad y ayudo, ya cu e situacion den e pais bisiña aki ta dificil. Aruba ta demasiado cerca di Venezuela y sra. Boom-Peralta ta haya cu mester existi un relacion di bon bisiña, ya cu ‘si bo bisiña ta den malo, abo tambe ta den malo’.