(EFE) – Consecuencianan humanitario di ocho conflicto cu Colombia ta bibando a bira mas intenso y a haya un “deterioro significativo” entre januari y mei ultimo, segun Comite Internacional di Cruz Cora (CICR) a adverti ayera diaranson.

“Den e prome cinco luna di aña, compara cu prome cinco luna di 2023, varios indicado a aumenta di manera contaminacion pa armanan,” e hefe di e delegacion di CICR na Colombia, Lorenzo Caraffi a destaca.

Un refleho di e situacion aki ta cu entre januari y mei di e aña aki, CICR a registra 194 victima di diferente tipo di artefacto explosivo, un crecemento di 35% compara cu e mesun periodo di 2023.

Tambe cu 69% di e victimanan ta coresponde na civilnan y ta “e porcentahe mas halto registra den ultimo seis aña,” segun e organisacion internacional a señala.

“Esaki como resultado di aumento di accionnan arma den algun zona di e pais y e lucha teritorial entre esnan arma cu no ta di Estado,” e rapport ta bisa.

E comite a agrega cu: “Indicadornan di e diferente problematica ta mustra e realidad compleho cu comunidadnan di varios teritorio ta enfrenta, sinembargo, e cifranan no ta alcansa refleha e temor, incertidumbre y sufrimento cu miles di hende ta experimenta.”

Un otro aspecto relevante ta aumento di contaminacion pa armanan. Di 43 municipio den cual a presenta accidentenan cu artefactonan explosivo den aña aki, 15 no a reporta victimanan na 2023. Esey ta nifica cu “e fenomeno ta sigui crece na zona nobo di e pais.”

Igualmente, den e prome cinco luna tabatin 31,832 persona cu a ser aisla, un aumento di 101% compara cu e mesun periodo na 2023.

26,753 tabata victima di desplasamento forsa, un 49% mas cu aña pasa.

Pa CICR ta preocupante cu e problematica aki lo por tin un impacto mayor den poblacionnan etnico, por ehemplo, mas di e 60% di casonan ta pertenece na comunidadnan indigena of afrodescendiente.

“Na e situacion humanitario hopi compleho aki ta uni e persistencia di e fenomeno di desaparicion. Entre januari y mei 2024, CICR a documenta 78 caso di desaparicion relaciona cu conflictonan arma y violencia cu a sucede den e lunanan ey,” e organismo a reporta cu aña pasa a reporta 222.

Rapport tambe ta mustra cu e prome cinco luna di aña a reporta 116 acto violento contra esnan cu ta eherce funcionnan den salud.

“Di e eventonan aki, 73 a sucede den marco di conflictonan arma, unda Cauca ta e departamento mas afecta pa e situacion, eynan a registra 41% di e casonan.

CICR a insisti na esnan envolvi den conflicto pa respeta e derecho internacional humanitario y garantisa e proteccion cu e tipo di norma ta concede na esnan cu no ta participa of a stop di participa den dje.