Situacion financiero-economico te cu november 2021 manera proyecta; Empleo a sigui mehora, segun cifra di SVb

Banco Central di Aruba a publica recientemente cifranan di entrada di gobierno te cu december 2021, a base di cual Bon Dia Aruba a recoge e cifranan di aña 2021 completo y a haci un comparacion cu e añanan anterior, 2019 y 2020, te na e mesun fecha ey, y cu e cifranan di presupuesto 2021.

E tendencianan señala anteriormente den varios articulo di mesun caracter, a sigui mesun rumbo, marcando un mehoracion di entrada di diferente tipo di impuesto (invoerrechten, accijns, BBO/BAVP), cu ta mustra riba un mehoracion di e clima economico. Cu excepcion di loonbelasting, cu a cay, tanto den comparacion cu 2020 como 2019. E cifra di CBA pa 2021 ta indica cu e resultado final di loonbelasting ta hasta menos cu loke tabatin presupuesta: Afl 190.4 vs Afl. 195.7. Esaki tabata visible caba den e cifranan te november, unda manera señala den e anterior articulo na januari, e loonbelasting tabata solamente 87% di loke tabata spera di haya den henter 2021. e E caida aki tabata anticipa, y ta refleha tambe den e cifranan di empleo, cu ta trata despues den e articulo aki.

Entrada Total

Entrada total gubernamental a aumenta, compara cu 2020 y 2019. Entrada di impuesto na 2021 ta un poco mas halto cu e aña anterior, pero no mucho mas, Afl. 24,5 miyon. (2,3%). Total di impuesto pa e aña tambe a mustra un mehoracion marginal, di Afl. 937,5 pa Afl. 941 miyon (0,37%).

Pone tabel 1 aki please

Impuesto

Den Tabel 2 aki bao por mira e cifranan actualiza pa diferente tipo di impuesto, te cu fin di 2021, compara cu e mesun periodo di 2019 y 2020. Fuera di loonbelasting, tur categoria inclui aki a mustra un avance aña pasa, aunke den caso di BBO/BAVP e aumento no a resulta loke tabata anticipa na inicio. E resultado, Afl. 181.1 miyon tabata Afl. 14,6 miyon menos cu e Afl. 195,7 miyon presupuesta. Esaki tin un probable relacion cu e momentonan dificil di contagio halto, specificamente na augustus y september, loke a ocasiona un slowdown considerable den e periodo ey, pa turismo y consecuentemente pa e sectornan relaciona cu turismo.

Di otro banda, tanto impuesto di importacion como accijns a mustra mehoracion compara tanto cu 2019 como 2020. Pa e categorianan relaciona cu importacion aki a registra un nivel cu ta 15% mas halto cu e entrada registra na 2020. Compara cu 2019 ainda fondo recauda via importacion no a alcanza e nivel di 2019, cu tabata na Afl. 338,6 miyon, loke ta Afl. 36 miyon mas cu 2021. En total tin señal cla cu economia ta bay den bon direccion, a pesar di e problemanan menciona motibo di e brote di Covid-19. Y cu tambe ta indica con crisis di salud cada biaha ta keda afecta economia, haciendo esaki un factor importante pa tene na cuenta.

Pone tabel 2 aki please

Empleo

For di e cifranan menos alentador di loonbelasting, aunke den Presupuesto 2021 a tene cuenta cu esaki, cu lo ta mas abao cu na 2020, por conclui cu empleo no a bolbe (ainda) na e nivel unda e tabata. Na e momento aki e unico fuente confiable di empleo ta e estadisticanan di SVb, meintras e autoridadnan di sector laboral no ta dispone di cifra periodico di desempleo. Ta imposible pa sigui desaroyo di empleo y desempleo si ta di un banda so tin cifra cu seguimento continuo. Esaki ta e motibo pa en todo caso haci uso di e cifranan cu SVb ta brindando.

Pone tabel 3 aki please

Cifranan di SVb tabata mustra cu empleo oficialmente registra na e banco di seguro social di di januari y februari 2022 ta mustra ainda un diferencia negativo di mas di mil empleado, compara cu e situacion pre-Covid di januari 2020, pero ta mustra tambe un mehoracion sustancial compara cu 1 di januari 2021, di 1.486 empleado mas registra. Tambe den relacion di trabao tin 2.090 empleo mas registra na januari 2022 cu un aña antes. Tin un aumento modera di cantidad di empresa registra, algo mas di 200 mas na 1 di februari 2022 cu na inicio di 2021 y 379 mas cu den e situacion pre-Covid (jan 2020). Tambe por mira cu den luna di januari 2022 ya caba tin un aumento di mas di 200 empleado y 300 relacion di trabao.

Banda di e cifranan di empleo oficial ta keda e preocupacion pa e cantidad di empleo informal. Esaki ta ocasiona un aumento di poder di compra, pero di otro banda no ta contribui ni na loonbelasting ni na e fondonan social. Manera constata anteriormente den e serie di articulo aki, lo mester aumenta control riba actividad economico, pa gobierno no ta perdiendo innecesariamente ingreso, mientras su situacion financiero ta sigui dificil.