Segun por conclui for di informacion di Venezuela y fuentenan internacional, e situacion na e pais bisiña ta empeorando rapidamente. Esey tanto pa loke ta e situacion politico interno, como pa loke ta situacion economico y particularmente e situacion financiero di gobernacion y su financiado principal compania nacional di petroleo PDVSA.
Pa loke ta e situacion politico, despues cu oposicion a logra haya control riba parlamento (Asamblea Nacional) a cuminsa un guera di trinchera cu e Chavistanan cu tin e poder ehecutivo. Forsa arma ta hunga un papel clave den henter e disputa aki, ya cu nan lo mester garantisa orden publico y esun cu no por conta cu nan apoyo, lo tin un problema grave. No ta imposibel imagina cu hasta por yega na un situacion unda temporalmente forsa arma ta tuma encargo di gobernacion. Ademas escenario ta keda complica pa Tribunal Supremo, unda e regimen Chavista a logra nombra un composicion leal na nan cu ta e principal arma cu e gobierno tin contra e parlamento nobo.
Mientras tanto e situacion economico ta sigui deteriora. Cu e caida di prijs di petroleo entrada di divisa no ta suficiente pa cubri e importacion mas necesario. Esaki ta haci cu produccion local tambe ta para, pa falta di materia prima y piesa. Scarsedad di producto basico di alimento y medicamento tin e poblacion bastante desespera caba. Inflacion aña pasa ta calcula na mas di 200% pero segun IMF por bira mas di 750% e aña aki.
Desde algun tempo, falta di divisa den forma di cash a bira asina serio, cu e pais a cuminsa bende parti di su reserva di oro. Dia 25 di februari ultimo a sali e noticia cu a traslada 1.3 biyon dollar na oro pa Suisa pa por paga un total di 2.3 biyon na bono cu ta madura. Un parti, 1.3 biyon, lo mester a keda cancela ayera dia 26 di februari. Expertonan ta kere cu e pais tin ainda mas o menos 14 pa 15 biyon dollar di reserva di cual solamente 1 biyon ta den cash y resto den oro y otro material precioso. E situacion di likido a bira sumamente serio ya cu e pais mester importa mas di 50 biyon dollar pa aña pa mantene nivel actual di abastecemento. Mas laat den e aña aki e problemanan grandi ta na caminda ora cu mester haci otro pago grandi di cinco biyon dollar na bono cu ta madura na october y november, mientras cu no tin manera pa pone placa un banda pa esaki.
Banda di esaki e mayor contribuyente cu cash pa gobernacion ta e sector petrolero, completamente controla pa e compania nacional PDVSA. Entrada di benta di crudo y producto petrolero ta menos di mita di loke e tabata aña pasa, prome cu e caida di prijs internacional di crudo. Esey ta haci e problema financiero pa PDVSA cu tabata existi caba, mas urgente ainda. Simplemente no tin suficiente recurso pa cumpli cu su mes necesidadnan di inversion y alabes percura pa sacia e sed ilimita di gobernacion pa placa, pa nan tambe mantene nan cabes riba awa.
E situacion aki di descapitalisacion di PDVSA tin su consecuencianan caba. Por ehemplo no tabatin suficiente avance den e negociacionnan cu posibel partnernan pa construccion di upgrader nobo cu ta necesario pa por produci un volumen creciente di crudo di Orinoco cu e pais mester. Un di e problemanan den e negociacionnan ta cu Venezuela (y PDVSA) ta exigi un parti mas grandi di e beneficionan di e explotacion loke ta haci esaki bira menos interesante pa e partnernan comercial di exterior. E falta di avance den e produccion di crudo nobo di Orinoco tin consecuencia grave pa e produccion total cu ta cayendo, ya cu e produccion tradicional di e area di Maracaibo entre otro, no ta produci mas manera antes.
E panorama actual ta uno di un compania den problema serio, cu mescos cu su gobierno tambe ta buscando refinanciamento di su debenan pa por continua. E creacion reciente di un compania militar paralelo, cu por asumi e tareanan di PDVSA, ta mustra riba e posibilidad cu gobierno ta anticipa un posibel collapse di e compania, o ta anticipa un situacion unda militarisacion di henter e sector petrolero lo ta clave pa gobierno sobrevivi.
Tur e desaroyonan aki mester ta un advertencia serio pa gobierno di Aruba, cu na e momento aki ta buscando cu hopi afan pa yega na un acuerdo cu PDVSA y su filial CITGO pa reapertura di e refineria na Aruba. Tin hopi kabel los den e asunto aki, tanto cu Citgo como cu Valero, entre otro encuanto e responsabilidad pa limpieza di e tereno dia cu no tin un refineria mas. Tambe tin pendiente pa 25 di april venidero na Merca e caso di soborno y labamento di placa contra Roberto Rincón unda ta trata netamente di robo y descapitalisacion di PDVSA, den cual caso mas detaye por bin sali cu ta tira un luz negativo riba e posibel partnernan nobo di gobierno di Aruba. Por tin mas aspecto scondi tras di e fecha final di fin di maart?
