Situacion fastioso cu container di sushi; Hende sinberguensa ta yena container di sushi cu no a paga p’e

Recientemente den un grupo popular ariba red social Facebook, un usuario a haci un publicacion ariba un situacion fastioso cu a tuma luga cu ta involucra un baki di sushi y hendenan sinberguensa cu ta probecha di situacionnan y ta perhudica otronan.

E usuario aki a conta cu el a paga pa huur un baki di sushi (container) pa tira sushi afo pa yuda un adulto mayor haci limpiesa na su cas. Lamentablemente, hendenan sinberguensa a probecha di esaki, y prome cu e usuario por a yuda e adulto mayor cu e limpiesa di su cas y benta e cosnan afo, ya otro hende a yena e container full cu sushi.

“Mi djis kier a skirbi tocante un topico cu mi ta haya hopi erg. Un hende ta huur un baki di EcoTech pa purba yuda un hende di edad haci su cas limpi pa e por tin un mihor vivienda saludabel (hoarder). Y otro hende ta bin anochi y yena e baki FULL cu nan NO a paga pie cu tur nan sushi (sofa, mata, television y hopi mas…) y e hende mes cu ta paga pa huur e baki awo no por ni usa su mesun baki. Con esaki por ta posibel? Un baki no ta barata. Mester tin un sistema di control,” e usuario a publica.

Un situacion cu sigur ta fastioso y ta causa disgusto grandi. E publicacion aki a ricibi hopi comentario, hopi reaccion, di otro usuarionan di Facebook cu a comparti e frustracion di e persona cu a haci e publicacion.

“Cera wowo y nanishi y coba aden. Busca cualkier recibo cu nomber riba dje y yama polis,” un usuario a contesta.

“Yama polis. Bisa nan traha un rapport di e incidente. Next check si tin camara rond cu por a capta algo of algun testigo. Hopelijk esey ta e caso. Laga polis busca e sinberguensa cu a haci esey y pone saca tur cos di eynan. Suerte,” otro a comenta.

“Asina a para bira na Aruba. Tur sinberguensa kier probecha pa no saca placa pa paga pa benta nan sushi afo. Hendenan asina bo por yama nan pa sinberguensa trankil den nan cara,” otro usuario a expresa.

Lamentablemente esaki ta algo cu ta sucede frecuentemente. Varios persona a comenta ariba e mesun publicacion aki cu nan tambe a pasa den situacion fastioso asina y mester a tuma medidanan, manera pone candal na e baki di sushi, pa esaki no pasa mas.