Recientemente Banco Central a publica e cifranan di entrada di gobierno pa prome nuebe luna di 2015. Despues cu na luna di augustus ultimo nos a elabora a base di e cifranan di prome mita di aña, den e articulo aki anto e panorama basa riba tres cuarto di aña.
En general por bisa cu e aspecto mas sobresaliente ta e caida di tanto entrada total como entrada di impuesto den e periodo aki, compara cu e mesun nuebe luna di 2014. Na 2014 entrada total (Total Revenue den terminologia di CBA) tabata Afl. 810.8 miyon, y na 2015 esey ta Afl. 777.1 miyon: -4.1%. Entrada Total di Impuesto (Total Tax Revenue) tabata 740.8 miyon na 2014 y e aña aki a yega na 716.5 miyon: -3.2%. Si no tin mehoracion substancial den e ultimo trimester di aña, esaki lo significa cu gobierno no lo tin mas entrada compara cu e aña anterior, loke si tabata e expectativa. Mester bisa si cu tradicionalmente e ultimo trimester ta esun cu mas entrada di impuesto. Tabata spera un crecemento economico relativamente fuerte pa e aña aki, loke realmente nos no ta mira ta materialisando. Aña 2014 caba nos por a mira un caida den entrada total, a pesar di un crecemento fuerte di entrada di impuesto. E entradanan adicional (principalmente dividend) a cay fuertemente compara cu 2013. Loke nos ta observa na 2015 ta un continuacion di caida di entrada adicional, mientras cu awor entrada di impuesto tambe ta den un rumbo negativo. Esaki ta significa, si no tin mehoracion, cu pa di dos aña sigui gobierno ta mira su mes confronta cu caida di entrada total, mientras cu henter e plan di rescate di gobierno ta basa riba e filosofia di haya mas entrada, a traves di un economia floreciente cu ta genera mas impuesto. Desde 2011 nos por a observa un crecemento continuo den entradanan di impuesto, superando aña pasa pa prome biaha e nivel di 1000 miyon (1001.8). Ta insigur ainda si ta logra yega na e nivel ey, aunke mester bisa cu tradicionalmente e ultimo tres luna di aña ta drenta relativamente mas placa, por medio di entre otro mas importacion y loonbelasting di bonus di fin di aña.
Den e tabel siguiente nos ta duna e cifranan mas importante al caso.
Entrada Total ImpuestoTotal Entrada Adicional
2011 980.8 (Miyon Afl.) 859.2 121.6
2012 1020.7 921.2 99.5
2013 1142.9 943.3 199.6
2014 1117.9 1001.8 116.5
2015* 1036.1 955.3 80.8
*: proyeccion henter aña a base di 9 luna
Por mira cu entradanan adicional, cu pa gran parti ta bin di dividend di e empresanan estatal, a mengua bastante na aña 2014, despues cu 2013 tabata un aña ‘top’ pa esaki. Te awor no ta mira den e cifranan di 2015 un mehoracion tumando luga den esaki, considerando tambe e situacion menos faborabel pa e empresanan aki, di cual CAFT por cierto ta menciona algun como posibel candidato pa ayudo di gobierno, na luga di trece dividend pa gobierno. Te awor aki na 2015 den nuebe luna 60.6 miyon (2014: 70 miyon) a bin di otro fuente cu no ta impuesto, di cual e parti di dividend no ta conoci pa nos.
Pa loke ta e diferente impuestonan, nos por duna e siguiente bista:
Comparacion kwartaal I,II y III di 2014 y 2015
2014 2015 ∆ %
Entrada total 810.8 777.1 -4.1
Entrada Imp. 740.8 716.5 -3.2
Loonbelasting 200.2 186.5 -6.8
Importacion Total 206.1 207.0 +0.4
Imp. Importacion 115.6 113.8 -1.5
Accijns 90.5 93.2 +2.9
BBO 69.7 71.5 +2.5
Foreign Exch. Tax 41.8 36.2 -13.3
Mirando e panorama menos faborabel aki, ta di comprende cu na mita di e aña aki gobierno a recori na impone un porciento mas di BAZV, ya cu esaki, kitando 1% di prima di AZV, ta trece en total anualmente mas di 80 miyon aden cu ta bay pa AZV, y ta libra gobierno di mayor parti di su obligacion cu AZV. Di e manera aki, sin crecemento di impuesto y otro entradanan mes, ta logra pa aumenta e espacio riba presupuesto pa otro compromiso.Talbes awor ta mas comprendibel cu CAFT ta insisti den e 50 miyon florin extra cu e introduccion di e ABB mester a trece cun’e pa 2016. Atrobe pa 2016 gobierno ta basa su expectativa riba un crecemento economico fuerte, mientras cu 2015 te awor ta mustra cu, a pesar di cierto crecemento den turismo, e totalidad di economia no ta duna señal di tanto vitalidad. Specialmente e poder di compra di e ciudadano no ta duna pa keda montona medida riba su lomba. Igualmente pone mas carga riba e empresanan den sector priva, lo duna e mesun efecto pa gobierno: mas peso riba empresa ta significa prijs mas halto y caida di poder di compra, y finalmente menos entrada pa gobierno. Na e momento aki ta un cos ta yuda, y esey ta corta gasto innecesario den gobernacion.
