Gobernador di Puerto Rico a reuni diasabra cu e alcaldenan di e isla, na momento cu un dam localisa na noroeste di e teritorio tabata menasa di collapse, causa pa e inundacionnan  grandi, genera pa yobida fuerte cu horcan Maria a trece cune.

Gobernador Ricardo Rosselló a bisa diabierna cu como 70.000 persona cu ta biba den e area menasa pa e collapse di e dam di Lago Guajataca tabata den evacuacion, pero autoridadnan municipal a sugeri diasabra cu no tin tanto hende na riesgo manera tabata pensa anteriormente y cu como 320 persona so a ser hiba na zonanan sigur, asina e diario local El Nuevo Día a informa.

No tabata posible contacta funcionarionan riba diasabra pa nan duna un actualisacion di e evacuacion o tocante e dam, cu segun autoridadnan tabata  den peligro inminente di un collapse total.

Mientras tanto, hende riba henter e isla tabata lucha pa limpia e devastacion laga atras pa e tormenta, cu a causa morto di por lo menos 25 persona den su paso atraves di Caribe, segun funcionario y medionan di comunicacion.

“Cuminsando e reunion cu nos alcaldenan pa haya conoce e necesidadnan mas urgente y e distribucion di e recursonan,”  Rosselló  a bisa riba Twitter diasabra.

E inundacionnan fuerte, e dañonan structural na e hogarnan y e caida di practicamente tur e energia electrico ta e tres problemanan mas preocupante pa e poblacion, e gobernador di New York, Andrew Cuomo,  a bisa durante un gira riba e isla.

“E ta un situacion inmediato terible  cu ta rekeri asistencia di gobierno federal, no asistencia financiero so,” Cuomo a bisa, cu ta goberna un estado cu tin miyones di persona di descendencia puertoriqueño.

“E ta un situacion peligroso awe y ta bay ta un asunto di reconstruccion a largo plaso durante varios luna,” Cuomo a declara, cu ta representa un potencial candidato democrata cu bista riba eleccion presidencial na 2020.

Christina Villalba, funcionario di e agencia di maneho di emergencia di e isla, a bisa diabierna pasa cu no tabatin duda cu e dam di Guajataca tabata na punto di collapse.

“Por ta awe nochi, por ta mañan, por ta den e proximo dianan, pero ta hopi probable cu lo ta pronto,” el a declara na Reuters via telefon.