(AP) — Un situacion di rehen na aeropuerto Hamburg a termina diadomingo atardi, rond di 18 ora despues cu un homber a pasa cu su vehiculo door di e gate di aeropuerto cu su yiu di 4 aña den auto, segun autoridadnan. E homber a keda aresta y ta parce cu e mucha a sali ileso.
Polis di Hamburg a post riba X cu “e situacion di rehen a caba. E sospechoso a laga e auto cu su yiu muhe… e mucha ta parce di ta ileso.” Polis tambe a bisa cu “servicio di emergencia a aresta e homber sin resistencia.”
E aeropuerto den ciudad nort di Alemania tabata cera pa pasahero y vuelonan tabata cancela desde diasabra nochi ora cu e homber, kende tabata arma, a kibra door di un gate di aeropuerto cu su vehiculo y a tira dos biaha den aire cu un arma, segun agencia noticiero Aleman, dpa. E homber a core e vehiculo net pafo di un edificio di terminal y a parkeer bao di un avion.
Autoridadnan a bisa cu ex-esposa di e homber anteriormente a tuma contacto cu nan tocante secuestro di mucha.
Polis a bisa cu e homber di 35 aña di edad, un ciudadano Turco, tabatin su yiu muhe den e auto despues di lo a tum’e cu forsa for di e mama den un bataya andando pa custodia.
Un psicologo tabata negociando cu e homber pa varios ora. Ningun persona a resulta herida den e enfrentamento despues cu a evacua tur pasahero for di e aeropuerto, segun polis.
Mama di e mucha muhe tambe a yega e aeropuerto trempan riba diadomingo.
Diadomingo anochi, polis a duna detaye di identidad di e persona cu a tuma e rehen, bisando cu tabata un ciudadano Turco kende ya tabata bao investigacion pa a secuestra su yiu muhe na maart di 2022, segun dpa. E tempo aya el a biaha pa Turkia cu e mucha sin autorisacion, pero despues e mama a logra trece e mucha back na Alemania.
Polis no a revela nomber di e sospechoso den linea cu reglanan di privacidad Aleman.
Medionan di comunicacion local a reporta cu e homber, kende a para su auto banda di un avion di Aerolinea Turco durante e enfrentamento, a exigi pa laga e y su yiu bandona Alemania y bula bay Turkia.
Mas cu 100 vuelo a keda cancela y varios avion desvia durante e situacion di rehen cu a dura 18 ora.
Miles di biahero a resulta afecta pa e enfrentamento, y centenares mester a bay keda na un hotel cercano.
Operacion di vuelo na e aeropuerto a reanuda diadomingo anochi, casi 24 ora despues cu e situacion di rehen a cuminsa. Alcalde di Hamburg, Peter Tschentscher a expresa alivio cu ningun hende a resulta herida den e incidente. “E situacion na aeropuerto di Hamburg a caba despues di oranan largo y dramatico,” Tschentscher a skirbi riba X, gradiciendo polis pa nan esfuersonan. “Mi ta desea e mama, e mucha y su famia hopi forsa pa nada cu e experiencianan terible aki,” el a agrega.
