Prome Minister Evelyn Wever-Croes a indica cu e situacion interno di e pais bisiña di Venezuela ta uno tenso y dificil, considerando tambe e ultimo sancionnan adicional di gobierno Mericano. Un decision cu tambe ta afecta nos indirectamente, mirando e situacion di e refineria den man di Citgo.
Recientemente nos Prome Minister tabatin deliberacion cu e Consul Mericano y nos Minister Plenipotenciario na Washington ta esunnan cu ta canalisa e mensahe di gobierno di Aruba pa gobierno Mericano pa nan tene cuenta cu e impacto di nan decision riba nos isla.
“Nos no por pretende cu aki na Aruba nos ta bay cambia pensamento di Presidente Trump” pa cu Venezuela, el a bisa. Pero si nan ta spera cu Merca por yuda nos pa fortifica nos turismo y economia pa wanta e ‘golpinan’ pa motibo di e situacion dificil na Venezuela.
Un punto cu tambe tin di haci cu Venezuela y Aruba ta e situacion di e refineria. E mandatario a bisa cu e situacion ta ‘status quo’, kier men nada a cambia. E negociacion no ta canando mas lihe cu e ultimo simannan. Mas bien nan a pega. Pero si e ta contento cu Venezuela a asigna otro persona cu ta bay negosha e contract cu a wordo firma cu Citgo.
E ta spera cu e negociacion por conclui den algo concreto den e fase uno, caminda pais Aruba por sali for di e contract aki. Te ainda nos no tin e libertad pa bay den otro fase y cuminsa negosha cu otro partidonan. Segun e Prome Mandatario nan tin un lista di esnan cu a expresa interes. Pero huridicamente nan ta buscado e posibilidad aki for di Citgo pa logra e libertad di negosha aki.
Si no por logra un operador of si refineria di Aruba no por funciona sin crudo di Venezuela sin sancionnan di Merca- e ora mester pensa riba un Aruba sin refineria. Pero te ainda pais Aruba ta pega den e prome fase pa sali for di e contract cu Citgo, prome cu october 2020.
