Famia di Leoni Noni Brokke a haci un yamada atrobe pa donacion como cu e instituto medico unda e hoben ta haya terapia, a cambia nan maneho di pago. Awor mester paga cada siman.
Esaki di biaha ta crea un problema financiero pa e famia, ora di lesa nan comentario riba e Facebookpage cu nan a traha special pa e hoben. Manera conoci Noni tabata envolvi den un accidente pisa unda cu mediconan na Aruba a hasta conclui cu e hoben lo nunca drecha mas di dje. Seguro AZV ta bisa cu no por yuda cu e gastonan medico di su recuperacion como cu e seguro di e esun cu a causa e accidente mester cubri tur cos. Y esaki no ta suficiente pa paga e tratamentonan cu te awor tin resultado masha positivo mes: ta mustra cu Noni hasta por cana atrobe. AZV a bisa den un entrevista cu Bon Dia cu nan a haci nan maximo esfuerso pa toch por contribui.
Pero e famia no ta contento como cu nan ta haya cu hospital na Aruba ta culpabel tambe di fayonan medico cu hasta a costa e bida di Noni ora e tabata den hospital.
Awor na Colombia e ta haya tratamento y asina el a cambia di ta un pashent riba cama cu casi no tabata reacciona den uno cu awor riba e videonan ta mustra cu ta skirbi, papia y train su pianan pa por cana. Su famia a expresa caba cu si Noni lo keda haya su terapianan tur dia, e por cana atrobe na december. Pero awor nan tin e mala suerte cu e clinica a cambia di maneho di pago, y despues di paga full september awor ta pidi pago cada siman. E prome siman di october mester paga di biaha 2800 dollar, e famia ta bisa, cual a cay pisa riba nan. Pa motibo di esey nan ta pidi comunidad Arubano atrobe pa yudansa. “Su terapianan ta hopi esencial pa e por sigui progresa y pa e por cana bek. Cada dia cu e no haya terapia su curpa ta bolbe bira stijf y ta bira fastioso pe mes. E tin e motivacion pa sigui pero e ta hopi dificil pa nos financieramente. Leoni tin 22 aña so y e tin full un bida su dilanti.”
E caso aki ta mustra atrobe cu na Aruba ta falta seguro pa cubri casonan asina. Basicamente por papia di un situacion medico cronico y tin paisnan den mundo unda tin seguronan nacional cu ta cubri malesanan of situacionnan medico cronico. Como cu mas y mas malesanan ta birando cronico, esaki ta pisa hopi riba e gastonan di AZV. Asina mes no ta logrando pa cera nan buki positivo y recientemente e director tambe a indica cu mester mas entrada of haci algo cu e pakete. Sinembargo otro posiblidadnan tambe ta pa crea un extra seguro nacion pa cubri casonan di hende cu a nace of haya malesanan cronico of por ehempel tin limitacion fisico y/of mental. Esaki ta algo cu entre otro den pasado e fundacion Stichting Voor Verstandelijk Gehandicapten Aruba tambe tabata boga p’e pero te awor esaki no a bin riba e agenda di gobierno sea politico di partidonan.
