A transcuri mas cu tres siman cu Ahata a dicidi di lanta nan miembronan for di e hunta di supervision di ATA, y ainda e situacion ta sigui “status quo”. Asina un fuente fidedigno consulta pa Bon Dia Aruba a laga sa ayera mainta.
E dianan ta transcuri y ainda e impasse aki no a wordo resolvi. Minister di Turismo a yega di manda dos carta den direccion di Ahata pa nan reconsidera nan posicion y manda nan listanan di candidatonan, pero te ainda e asociacion cu ta representa e sector hotelero no a cambia su decision.
Oficialmente no ta conoci e causa cu Ahata a retira su tres miembronan for di e hunta di supervision di ATA. Ta wordo supone cu esaki tin di haber cu e diferencia di opinion cu ta existi entre e gremio hotelero y minister di Turismo riba e cambio cu e mandatario kier introduci den e ley di “All Inclusive”.
E ley aki ainda ta pendiente pa su tratamento, ya cu actualmente miembronan di parlamento ta den reces. Ya den pasado no solamente minister di Turismo sino directora di ATA, y presidente di e hunta di supervision di ATA a yega di vocifera nan opinion riba e asunto aki, caminda nan a solicita cu e situacion aki lo por normalisa bek pa asina no stroba e proceso y maneho normal di un instancia tan importante pa nos industria turistico.
