E situacion di Laboratorio Nacional of Landslaboratorium cu e aña aki a bira un fundacion bou maneho di Horacio Oduber Hospital (HOH) ta masha preocupante mes.
E D-day a yega caminda e trahadonan di ex-Lands-Lab Gobierno mester defini si nan ta prefera di bay otro departamento di gobierno of bin cu un areglo nobo como empleado di e fundacion cu a wordo lanta. Aunke minister di Salud a caba di informa parlamento cu e proceso cu e traspaso ta bayendo bon.
E cambio di statuut huridico for di un departamento di gobierno pa un fundacion no a cay den bon tera cerca un grupo grandi di trahadonan cu pa hopi aña ta bin trahando den Landslab Gobierno, brindando nan profesionalismo y experiencia; y awor nan no kier perde nan statuut di ambtenaar. Tur cos ta mustra cu gran parti di e trahadonan aki ta bay cay den e overtolligheidspool, creando un peso adicional pa presupuesto di gobierno sin produci nada.
Esaki ta e situacion di nan seccion serologie y microbiologie, unda mayoria di nan personal a pidi pa overplaatsing. E seccion di e laboratorio aki tin falta evidente di personal cualifica pa realisa nan trabou; ya cu esunnan nobo cu a drenta no tin mucho experiencia of nan no a adapta nan mes na e trabou delicado aki. Te hasta e hefe di e departamento aki a dicidi di no sigui cu e funcion aki. E trahadonan mes ta abstene di bisa algo pa evita cu eventualmente lo tin represalia contra nan cu lo por perhudica nan overplaatsing.
No tin un plan di continuidad
E baca a cuminsa hoga sin cu ainda Raad van Bestuur di HOH no a anuncia un plan di continuidad pa atende cu e problema aki. Esaki tin su impacto pa e dokternan of specialistanan trahando den HOH por bin cu un bon diagnostica of monitor e tratamento duna na nan pashentnan cu mester haci uzo di e servicio di e laboratorio di hospital. Mientras cu Minister Schwengle tampoco a manifesta su mes pa percura di bin cu un solucion prome cu e fundacion aki ta zink perhudicando e pashentnan, segun Bon Dia Aruba ta compronde.
Minister di Salud Publico y Minister di Asunto General, Mike Eman mester carga e peso di nan responsabilidad, segun e trahadonan, despues cu nan a dicidi independisa e Laboratorio Nacional a base di un rapport di AIB cu e mesun gobierno a pidi. Inicialmente a wordo recomenda pa Laboratorio Nacional por bira un NV of empresa estatal, y asina tur trahado ta keda ambtenaar . Gobierno por a ricibi un status huridico mescos cu na DOW. Pero esaki no a wordo formalisa y e mandatarionan a dicidi finalmente pa Laboratorio Nacional (Landslaboratorium) ta bay over den un fundacion bou Horacio Oduber Hospital (HOH).
Mientrastanto e problemanan a keda crece den e organisacion aki pa falta di hende, placa y hopi otro cos pa como laboratorio ta afecta nan pa por keda funciona bon.
