Desde algun siman caba diferente bario rond di Aruba a bin ta experiencia interupcionnan di coriente frecuentemente. Ayera marduga tabata e caso atrobe na unda tres biaha den e mesun anochi coriente a bay na diferente districto di e isla.
E prome interupcion di coriente a sucede na Jan Flemming ora cu un palo di luz a pega candela. Segun informacion brinda pa motibo di e saltpeter y stof cu ta para riba e kabelnan di coriente y teniendo na cuenta e condicionnan di clima na Aruba, por sucede cu e palonan di luz por pega candela.
E siguiente interupcion a afecta diferente bario y esaki a sucede pa motibo cu tabatin interupcion den produccion di coriente cu a afecta dos onderstation di ELMAR N.V. na e planta di WEB N.V.
E ultimo interupcion a afecta barionan di Seroe Pita, Tamarijn y otro barionan den bisindario. E causa di e interupcion aki tabata debi na un kabel cu a cay na Seroe Pita.
E situacion di coriente ta delicado y pueblo ta expresa nan malcontento pa e situacion ariba rednan social. Hopi ta cuestiona te ki dia nan tin cu soporta e mal servicio di e compania estatal y ta keda puntra cual ta e siguiente districto cu ta na turno pa keda sin coriente
“Tur dia coriente ta bay mester tin rebaho. Coriente bay kiermen coriente no ta na uso mes. Boso ta set di ladron y hambra pa placa manera gobierno” ; “Nos ta exigi descuento ariba nos recibo di coriente;” y “E cos aki ta increibel. Mi ta spera cu si un di mi cosnan di coriente daña ELMAR para responsabel tambe,” ta algun di e comentarionan cu ciudadanonan disgusta pa loke ta sucediendo.
Mientras tanto, manera cu minister di Labor, Energia y Integracion Glenbert Croes a indica durante un conferencia di prensa anteriormente, expertonan Mericano a bin Aruba pa haci investigacion, evaluacion y recomendacion pa drecha y mehora e partinan cu ta mas critico pa evita cu coriente ta sigui bay y afecta e comunidad di Aruba.
Preocupacion ta sigui crece y pueblo ta puntra si esey ta bay ta suficiente pa drecha e sistema deteriora pa por soporta e desaroyo cu tin na Aruba cu e hotelnan cu ta bay habri, sin conta e cantidad di hendenan cu lo mester yega Aruba pa por cubri e cuponan di trabao cu no por wordo yena.
