Ayera mainta un grupo di comerciante di Caya principal y bisindario a interumpi e debate den parlamento (lesa pagina 2). Bon Dia Aruba a pidi Frank Tieleman pa su comentario como un di e comerciante mas bieu den Caya y tambe conoci for di Mambo, e asociacion cu pa hopi aña a bringa pa desaroyo positivo den e area aki.

E comerciante Tieleman ta haya cu e asunto di Aruparking ta apenas un factor di e tantisimo factor cu mester analisa pa atende cu e situacion compleho di Caya. For di decada di añanan 70  e negoshi Tieleman’s Office Machines ta situa den Caya Betico Croes. “Mi no kier ta involucra den problema so. M’a hacie caba y aworaki laga e otronan kico nan por logra pa wak kico nan por yega na algo pa tin un cambio”.

Independientemente di e grupo cu a lanta pa protesta y cu respet pa nan; pero e ta haya cu asunto di habri Caya bek y introduccion di Aruparking no ta e unico factornan  sino cu nan ta parti di e puzzel. Igualmente no ta conoci si e grupo aki ta organisa, a pesar cu nan tin un chat group den WhatsApp. Di otro banda e organisacion cu gobierno a lanta pa maneha  henter caya no a trece ningun solucion concreto, segun e.

OBID no tin poder
Encuanto si ta bal la pena resucita Mambo, sr. Tieleman no ta kere cu esaki ta factibel ya cu e situacion ta full diferente. Ademas ta existi un organisacion lanta y reconoci pa gobierno cu ta OBID, maneha door di un persona cu ta masha limita; ya cu e no tin recurso financiero y tampoco poder di decision, pues e no por haci nada.

E no ta cuestiona e persona; pero si e ta cuestiona cu OBID ta un organisacion cu a pesar cu ta existi: “No t’ey!”

Nan di Mambo a traha 15 aña largo defendiendo e interesnan di e comerciantenan di Caya sin cobra un peso; y nan a logra diferente cos, segun sr. Tieleman. Tampoco OBID no a introduci un pago mensual of quota administrativo di parti di e comerciantenan pa bin cu tipo di promocionnan pa lanta nan benta. No tin organisacion basicamente pa haci esey, y no tin organisacion cu ta trahando berdaderamente ya cu e ta organisacion “ad hoc” cu no a duna resultado. E trabou aki ta di un hende cu mester ta full-time den e trabou aki di organisa Caya; y despues cuminsa traha.  Esey no ta tumando luga, segun e.

Niun diferencia
Kita of no e klem of bin cu cambio den Aruparking y habri Caya grandi bek pa trafico nan so… no ta bay haci niun diferencia, segun sr. Tielman. Ademas despues di 3’or atardi full Aruparking ta gratis y asina mes e hendenan no ta bin Playa. Mester tin un motibo mas di peso, ya sea cu mayoria di hendenan no sa of por ta otro motibo; pero mester investiga e pakico di esaki. P’esey e no ta haya cu gritamento lo yuda pa bay un tiki leu pa busca un solucion structural pa atende cu e problema den Caya.

Tin hopi mas factor cu parkeer y habrimento di Caya, asina sr. Tieleman ta keda enfatisa. “E ta un parti di un puzzel masha grandi y si e puzzel no ta completo e no ta bay traha. Experiencia di tur mi añanan ta bisa mi esey.”

Den su analisis sr. Tieleman ta reconoce cu antes di e transformacion den Caya, e situacion tabata precario pero a lo menos tabatin cliente. Awor nos tin un Caya bunita pero sin hendenan pa berdaderamente ta bay gasta cerca nan. Encuanto si e comerciantenan mester carga parti di e responsabilidad aki, e ta reconoce cu tin problema interno y externo tambe.  E interno ta cuminsa entre nan mes y externo tur factor rond di dje entre otro meter parkeer, tram, economia, habrimento di negoshi pafo, y ademas no tin niun incentivo pa e comerciantenan ta keda den ciudad.

“Ta hopi, hopi cos tin di haci; y no solamente di grita pa parkeer so no ta bay resolve e problema. P’esey mi ta afo!” Aunke e no ta experto, e ta duda cu habrimento di Caya lo stimula e benta nan cerca e comerciantenan.

Factor economico
Actualmente sr. Tieleman tin su edificio bashi pa casi un aña caba y e ta wak cu preocupacion cu negoshi estableci pa basta aña den Caya manera De Wit Book Store a cera su porta. E comerciantenan di antes tur a bay; y no ta resta nada sino luga bashi so, segun e.

E ta haya cu ta un lastima cu un Caya asina bunita ta pasando den e crisis aki. Gran parti ta responsabilidad ta di gobierno, y tambe di e comerciantenan mes. Inversion grandi a wordo haci pa embeyece e area y caya grandi mes, pero comercialmente no a duna niun resultado ainda.

E factor economico y poder di compra tambe ta hunga un rol. Pero pa sr. Tieleman e asunto ainda ta un dilema, manera ta bisa: “Kico ta prome? E webo of e galiña?”. Pero den sintesis, aworaki e ta haya cu ora ni sikiera nan ta purba di traha e webo of e galiña; eynan si tin problema!