E situacion cu a surgi entre Citgo y e trahadonan di refineria y terminal, a haya un dimension internacional.

Sindicato IOWUA (Independent Oil Workers Union of Aruba) a manda un carta pa USW (United Steelworkers), caminda IOWUA ta afilia na dje hunto cu e demas sindicatonan grandi cu ta representa casi tur e refinerianan na Merca, entre nan Citgo. USW ta un di e sindicatonan mas grandi di Merca. IOWUA ta considera importante pa uni forsa y lucha pa e derechonan di nan miembronan.

 

Pero di otro banda, prensa Mericano tambe ta interesa riba e asunto aki. Esaki ta un forma pa pone presion riba Citgo pa e compania aki por cumpli tur su obligacion cu tin prome cu ta bandona Aruba. Den e lucha aki, tanto IOWUA y FTA cu ta e sindicatonan cu ta representa e personal, hunto cu halto gerencia local, a uni forsa pa presiona CITGO.

IOWUA ta exigi entre otro pa Citgo cumpli cu e contract colectivo (CAO) cu tin vigente cu e trahadonan. Pero tambe pa Citgo cumpli cu gobierno y Aruba. Pues e mesun carta cu nan a manda pa USW, tambe IOWUA a mand’e pa prensa Mericano. IOWUA a informa su filial internacional cu como sindicato nan a solicita gobierno di Aruba pa prohibi e salida di e ehecutivonan di Citgo for di Aruba, te ora cu nan finalisa e negociacionnan y cu e compania aki por cumpli cu su obligacion.

 

Presidente di IOWUA, Johannes ‘Boy’ Anthony a yega di anuncia cu e siman aki e ta consider’e crucial, ya cu decision mester cay, despues cu Citgo a anuncia cu fin di luna nan lo stop nan operacion na Aruba. Den su carta pa USW, sindicalista Anthony ta presenta un actualisacion rond di e situacion di Citgo na Aruba. Den dje nan ta pone USW na altura cu Citgo tin intencion di bandona Aruba sin cumpli debidamente cu e trahadonan y demas acuerdo cu gobierno di Aruba y Refineria di Aruba (RdA).

Tambe IOWUA a yega di informa USW (United Steelworkers) cu Citgo ta nenga di paga pakete di indemnisacion manera nan a yega di paga na e grupo di trahadonan cu nan a retira na februari 2019. Solamente Citgo kier paga e trahadonan un cesantia minimo -segun ley ta prescribi- loke e trahadonan y nan respectivo sindicatonan no ta acepta. Igualmente IOWUA ta informa USW cu actualmente nan ta preparando un caso contra Citgo dilanti di corte.