Segun Parlamentario Xiomara Ruiz-Maduro, e situacion na dump ta un topico cu ta hopi keto riba dje mientras esaki ta bayendo di malo pa pio. Ex Parlamentario Sr. Booshi Wever ta splica Bon Dia cu esaki ta e consecuencia di mal maneho y cu gobierno ta cometiendo un crimen cu pueblo di Aruba.
”Na dump tin sushi ta drenta lama, esaki ta un crimen pa medio ambiente y tur hende ta keto”, Sra. Maduro ta bisa. Ex Parlamentario Sr. Booshi Wever ta splica Bon Dia cu esaki ta e consecuencia ora cu tin mal maneho di un sistema di dump. ”E tempo ey nos a bisa e tabata algo temporario, pasobra nos tabata mira cu e seronan tabata subi masha hopi mes y no por ta asina tampoco cu sin ningun tipo di control ta simplemente cende candela, un cos cu a tuma luga pa hopi aña. Pueblo di Aruba a inverti 15 miyon florin riba e proyecto aki na unda nos por a tin un sorto di separacion di sushi na dump, pa nos por cobra pa por haci Serlimar un compania di pueblo, genera su propio fondo pa por maneha su mes sin cu tin mester placa di pueblo”, Sr. Wever ta splica Bon Dia.
Sr. Wever ta agrega cu aworaki ta uza e argumento cu ora a pasa e ley na 2005 , ta uza esaki como pretexto cu ta Sr. Wever a bin cu e ley aki pa cobra anto ta lubida di bisa cu locual cu nan kier a bay cobra no ta solamente pa e recogemento di sushi,pero tambe pa e verwerking di e sushi aki cu ta e proyecto di Bouldin & Lawson. ”Aworaki ta cobra 25 florin solamente pa e recogemento di sushi y no tin e verwerking di e desperdicio aki. Esaki ta un ladronicia contra e pueblo di Aruba, enbes di percura pa verwerk e sushi tambe, bo ta gewoon recoge y dump e riba Parkietenbos , cende esaki na candela sin ningun tipo di control cu tur sorto di consecuencia na unda cu e huma ta bay den aire, y nos tin un gobierno cu ta pretende di ta berde y pa nos medio ambiente”, Sr.Wever ta splica.
Tin solucion pa dump?
Segun Sr. Booshi Wever e ta kere cu si tin un solucion pa dump cuminsando na pone e mashinnan di Bouldin & Lawson draai anto cumpra Diesel. ”Wak pa tin control pa no laga hendenan cu ta sigui ”ordo di ariba” pa tira entre otro cosnan cu bo no por tira den e mashinnan aki. Cos cu ta inaceptabel, pa mi tin solucion facil pa e mashinnan aki. Basa riba un estudio cu a wordo haci segun mi cu Sr. Jossy Lacle a haci di kico tur nos desperdicio di cas ta contene, anto den dje tabata tin cierto porcentahe di santo tambe pero aworaki a resulta cu tin hopi mas santo den e desperdicio di cas, awo si esaki ta daña e crushernan di e mashin, pone crushernan mas pisa cu lo costa un poco mas pero e ora bo lo soluciona e problema”, Sr. Wever ta bisa
Awendia segun Sr. Wever, tin crusher cu por hasta kibra un motor di auto, pues solucion tin si esaki lo tin mester. ” Si e magnet no ta saca tur e hero, bo ta pone un magnet mas grandi of mas cerca y atrobe mester tin control severo na kico ta drenta pa asina produci e fluff.
Prome cu mi a baha como Minister, nos a papia cu un compania cu tabata dispuesto pa uza e fluff pa produci energia cu por wordo bendi na WEB, no manera aworaki cu tin inversion cu pueblo di Aruba a paga mas cu 10 miyon florin na e compania di EcoTech cu te awe no ta manda gas ainda pa WEB. Esakinan ta cosnan cu ami ta bisa , crimennan cu mi ta haya hopi straño cu Ministerio Publico no a actua contra Benny Sevinger pasobra mi ta haya cu Sr. Benny Sevinger ta cometiendo crimennan contra nos comunidad y tur hende ta keda keto y lag’e haci locual e kier y bo ta haya un Sr. Mike Eman cu cada biaha cu Sr.Sevinger ta haci algo, e ta bira su cara otro caminda”, Sr . Wever ta splica.
