Sindicato STA a informa cu e accion di trahadonan di Inmigracion na Aeropuerto Reina Beatrix cu nan a yega di anuncia, ta wanta un rato, wardando riba cierto desaroyo cu gobierno.

Presidente di e sindicato Diego de Cuba a bisa cu awe tardi nan tin un reunion pa sigui atende cu e asuntonan y demanda di e personal di Inmigracion, entre nan promocion di algun di nan. Pa 2’or atardi tanto cu director di IASA y e minister encuestion cu den e caso aki ta e mandatario Arthur Dowers.

Sinembargo nan a tende cu nan ta bay haci un biahe pa Hulanda, pero te ainda prome cu el a duna e declaracion aki, STA no a wordo informa di niun cambio den nan reunion. E ta kere sinembargo cu e reunion ta sigui cu e director di IASA y su secretaria y representante di e minister tambe. “Minister si mi no ta kere cu lo ta presente e biaha aki.”

Sindicalista De Cuba a bisa cu e situacion di personal di Inmigracion na servicio di IASA ta keda tenso keto bay. “Mañan atardi nos ta wak si nos ta logra paga e candela.”

El a agrega cu tin hopi promesa cu a wordo haci cu prome cu 1 di mei, ministerio di Husticia y IASA lo tin tur cos regla. Pero di parti di STA nan ta mira cu ya caba awe ta 21 di april caba, y otro siman lo ta uno cortico mirando e dianan di fiesta. P’esey e ta haya e asunto aki critico ya cu e otro siman lo ta cortico y lo tin un weekend largo tambe ya cu dia 1 di mei, Dia di Obrero ta un dialuna, y e ta duda cu nan ta logra prome cu 1 di mei manera a keda palabra.

E sindicalista a bisa cu minister Dowers a keda di duna prioridad na e asunto di promocion di e personal di Inmigracion cu ta pendiente. Tambe tin un formatie rapport cu practicamente mester keda cla ya cu practicamente e ta cla caba pero den e ta den e fase di revision.

“Promocion ta locual ta preocupa nos hopi, y nan a haci un compromiso cu prome cu 1 di mei nan lo ta cla.” E ta spera cu e lo ta asina kiermen cu pa diaranson otro siman tur cos mester keda cla y tog STA ta wak esaki hopi dificil.

P’esey STA ta na expectativa di e reunion di awe tardi kico lo bay sali di dje. E ta un oportunidad –segun de Cuba- pa STA bisa gobierno cu e fecha cu nan a pone relativamente ta hopi dificil pa nan alcance.