E prome modelonan di e sistema integra nobo di ICT di Servicio di Impuesto Corsou a bay “live”. “Cu e lansamento aki a logra un stap hopi importante pa modernisa e organisacion di Servicio di Impuesto y hib’é na un nivel mas halto”, segun Minister di Finansa, señor Kenneth Gijsbertha.
Modernisacion di Servicio di Impuesto y desaroyo di servicio na cliente y digitalisacion a conduci cu e sistema actual no ta cumpli mas na e exigencianan. E sistema di ICT ta un parti hopi importante di e base pa desaroyo di e organisacion. Tambe Minister di Finansa ta duna di conoce cu realisacion di e sistema integra lo duna mas contenido na e vision y strategia pa integra Servicio di Impuesto, Ontvanger y Stichting BAB den un organisacion nobo.
Integracion di e Sistema di Servicio di Impuesto y Ontvanger ta forma punto di salida pa un sistema nobo yama Multi Tax System (MTS). Danki na e integracion cu for di awor den un administracion personal nobo, ta pone tur informacion corectamente den fail di e contribuyente di manera cu por procesa informacion mas rapido.
E cambio ta dirigi principalmente riba automatisacion di proceso den Inspeccion di Impuesto (“Inspectie der Belastingen”). Lansamento di e sistema ta un stap hopi importante pa facilita y duna miho sosten na nos empleadonan di manera cu e trabou haci lo ta mas eficiente y cu mas facilidad. Implementacion di e modelo nobo pa loke ta trata impuesto riba entrada (IB) ta haci posibel pa automaticamente procesa e declaracion entrega basa riba criterio predetermina. Esaki ta nifica cu ta acelera e proceso pa atende declaracion y cu e empleado por duna mas atencion na casonan compleho y complica.
“Loke ta mas importante ta e echo cu e contribuyente finalmente lo beneficia di e renobacionnan”, Minister di Finansa ta bisa. “E beneficio ta cu por procesa e declaracion mas lihe cu ta pone cu a largo plaso lo por saca mas beneficio for di e sistema nobo, banda di e facilidad di ta “online”. Por ehempel, por deposita restitucion mas lihe riba cuenta bancario.”
Ta maneha introduccion di e sistema nobo cu cautela y e ta tuma luga stap pa stap.
Actualmente e sistema ta suministra e proceso di impuesto di entrada for di 2019. Mas despues den e aña aki lo integra otro tipo di impuesto, manera Impuesto di Ganashi (WB) y Impuesto di Salario (LB). Loke tambe ta planifica riba termino cortico ta pa automatisa e sistema di Ontvanger. Lo complace pa e modelo “Multi Collection Solution (MCS)”, cual
lo integra completamente cu e sistema nobo di Multi Tax System. Anteriormente na aña 2019 un portal nobo a keda lansa cu pantayanan mas miho, den cual e contribuyente por haci su declaracion di impuesto online mas miho y digitalisa.
Na 2016, Ministerio di Finansa a cuminsa cu e proyecto pa crea y implementa e sistema. For di e momento ey, e proyecto a pasa dor di algun retraso y varios contratiempo. Na 2019, Ministerio di Finansa a forma un team di proyecto nobo, dirigi pa Minister di Finansa y señora Ersilia de Lannooy, Secretario General interino. Esaki a resulta den implementacion exitoso di e prome modelo. Tanto e “Multi Tax System” (MTS) implementa na Inspeccion di Impuesto, como e “Multi Collection System” pa Ontvanger a keda desaroya dor di Bearing Point, un compania local di ICT.
“Nos ta para ainda na comienso pa traha na un manera integra. Servicio Online a keda pone como e prioridad di mas halto. Cu e sistema nobo aki nos por logr’é, e ta haci suministro di informacion eficiente, completo y accesibel; completamente den liña di ambicion di Ministerio di Finansa. E logro importante aki lo no ta posibel sin e esfuerso di nos empleadonan di e diferente organisacionnan di impuesto y tambe e team di proyecto. Danki, un biaha mas”, Minister di Finansa ta conclui.
