ORANJESTAD – Ayera mainta, un cambio riba formulacion di prijs di combustibel a keda anuncia pa minister di finansa y asunto economico, Xiomara Ruiz-Maduro pa confronta e subida di e prijs di crudo cu ta biniendo.

Den e caso aki, a base di mutuo acuerdo cu Refineria di Aruba (RdA) a keda acorda cu e compania estatal aki ta absorbe 16.2 cen. Esaki ta e cifra cu ta wordo premira cu e prijs di e combustibel ta bay subi, segun e mandatario. E mandatario a bisa cu no ta pa semper e prijs lo keda manera e ta actualmente.

Sinembargo, esaki no kiermen cu RdA lo sigui absorbe e subida di e prijs di combustibel. E biaha aki nan ta haci’e teniendo na cuenta e reserva cu nan tin di combustibel cu nan a cumpra na un prijs mas barata di loke ta wordo calcula den e proximo lunanan.

Minister presidente encarga cu asunto di energia, Evelyn Wever-Croes a drenta den combersacion cu RdA pa hunto wak e posibilidad di por uza e factura of prijs real cu nan a paga pa pone un prijs pa nos consumo local. Pero e luna aki, e prijs lo keda mescos cu e luna di maart. Pero e otro lunanan, gobierno lo bay informa kico ta e negociacion final cu RdA. Tambe nan lo indica e manera con nan lo bay calcula e prijsnan di productonan petrolero.

Contestando pregunta di Bon Dia Aruba si e decision aki no ta pone den riesgo e situacion financiero di RdA, e mandatario a bisa cualkier decision mester ta uno factibel pa e compania aki. Aunke e ta un empresa di gobierno, cualkier decision mester ta un bon decision cu RdA por carga, el a agrega.

“Pero esaki no kiermen cu no lo tin subida ni bahada,” el a bisa. E mandatario a mustra un grafico pa ilustra e tendencia di e prijs mundial di combustibel. E ta manera un patronchi, unda generalmente pa e lunanan aki e prijs ta subi, y pa fin di aña e ta registra un bahada. A base di deliberacion, nan a dicidi di bin cu otro calculacion mirando cu RdA tin reserva di combustibel cu a cumpra na prijs mas barata. P’esey nan por a freeze e prijs, sino e luna aki gasolin mester subi cu 16.2 cen. E luna aki RdA ta bay absorbe e 16.2 cen. Ta keda pendiente con e prijs ta bay cambia pa e proximo lunanan. “Otro lunanan, sea bo ta conoce un rebaho of bo ta conoce un subida.”

Te aworaki, e prijs di producto petrolero ta wordo stipula a base di informacion di PLAT’s riba e benta di combustibel riba mercado internacional na corto y mediano plaso. Cu e informacion aki, departamento economico tabata uza como guia pa bin cu e prijs cu e productonan petrolero mester wordo bendi na Aruba. Nan tabata haci esaki prome cu esaki a cay den man di RdA.

El a splica cu antes, e importadonan tabata e refineria mes, cu tabata den man di Valero y Citgo, y a base di promedio, e prijs di productonan petrolero tabata wordo stipula. Awor departamento economico lo haya colaboracion di RdA a base di loke realmente nan a paga pa trece e combustibel aki na Aruba. Di e forma aki, tambe nan ta duna atencion na e comentario cu con por ta posibel cu si Aruba a cumpra gasolin na prijs barata, y tin un reserva di tres luna, pakico e mesun gasolin aki ta wordo bendi mas caro e otro luna, debi cu e prijs a subi internacionalmente, a pesar cu el a wordo cumpra mas barata prome.