Gabinete Rutte III den e acuerdo di gobernacion ta priminti di combati pobresa na Hulanda Caribense. Realidad ta cu pobresa na Boneiro ta aumenta cu e sistema nobo di tarifa di awa y coriente.

Asina Bestuurscollege di Boneiro ta bisa awor cu  ministerio di asuntonan economico y clima (EZK, Economische Zaken en Klimaat) ) a otorga menos cu mita di e subsidio di coriente cu a pidi. Esaki Ret Karibense ta informa.

E contribucion di EZK na e gastonan di red (tarifa fiho) lo mester a compensa e consecuencianan desfaborabel pa e viviendanan di mas chikito. Cu e promesa aki Hulanda a forsa pasa e lei electricidad y awa di bebe BES riba 1 di juli 2016, pero Hulanda no a haci bon investigacion delanta di e consecuencianan.

Desaster social
A introduci e structura di tarifa nobo na Saba y Sint Eustatius aña pasa sin mucho cos. Na Boneiro e lo drenta na vigor dia 1 di april cu consecuencianan desastroso pa vivienda chikito. Gobierno insular ta haya sosten di e opinion aki cerca organisacionnan di consumido, sindicato, empresario, y e fundacion di cas, FCB. E bond di consumido Unkobon ta pronostica un desaster social.

Bestuurscollege di Boneiro a manda un carta di protesta pa Den Haag pa pidi atencion pa e consecuencianan di e sistema nobo. Diputado Ibi Martis ta bisa cu no ta solamente consumido ta haya golpi, pero economia tambe. “Turismo lo bira mas caro, pasobra pa e sector di hotel tambe e tarifanan lo subi hopi. Asina inversionista lo spanta y keda sin bini.”

E colegio di gobernacion ta haya cu ta remarcabel cu e ministerio di infrastructura y maneho di awa (I&W, Infrastructuur en Waterstaat) aparentemente si ta compronde e problema y EZK no. E peticion pa subsidio di compania di awa y electricidad Boneiro (WEB) I&W a aproba completamente, y asina e tarifa fiho di viviendanan por keda riba 7 doller pa luna. Pa electricidad esaki ta bira 34 doller.

‘No ta funciona den comunidad chikito’
Sinembargo e uzadonan chikito tambe mester bay paga mas pa awa pasobra a cancela e sistema di tarifa progresivo. “E punto di salida di e lei nobo ta cu tur hende mester haya trato igual”, manager financiero Marion Manuela di WEB ta bisa. “Esaki ta funciona bon den un pais grandi, pero mi opinion personal ta cu e no ta bon pa un comunidad chikito manera Boneiro.”

WEB  ta trata di parti e subsidio di electricidad cu si a duna, mas bon posibel. Cliente cu Pagabon, cu ta paga delanta, lo ripara mas poco posibel. Sr. Manuela ta pensa cu cliente cu ta paga despues di uza tin bia miho por cambia pa Pagabon. Pero e consecuencianan ta diferente pa cada vivienda y p’esey e no por duna un bista general.

Bestuurscollege di Boneiro kier mantene e sistema di tarifa progresivo. Segun e sistema ey e viviendanan chikito ta paga poco y e tarifa ta subi segun cu uza mas awa of coriente. “Esaki ta funciona bon cincuenta aña caba y ta conoci den e region aki.” Sr. Martis lo kier a hala e lei nobo un banda, pero pa haci esaki tin sancionnan basta pisa.