Dia 29, diabierna cu a pasa a yega na firmamento di un contracto cu e compania KPMG pa e software nobo pa Dimas. Dimas ta uzando un sistema for di 1993 (Nava Systeem), cual den e ultimo 7 añanan a crash algun biaha. Pa a haya piesa pa e sistema aki mester a core rond mundo, pa e proceso por a sigui. Esaki consecuentemente a conduci cu a bay na destaho pa un sistema nobo, teniendo na cuenta e problema serio cu lo presenta na Aruba si e sistema crash y no haya piesa mas.
Segun Minister Benny Sevinger Minister di Desaroyo Teritorial, Infrastructura y Integracion, Dimas hunto cu FDA cu ta esun cu ta bay financia e proyecto di cambio di sistema, a cana un proceso di destaho y porfin a yega na un ganado, cual ta KPMG cu kende a firma diabierna. Asina lo bin cu e sistema nobo cu yama Cirsa. Lo cuminsa traha inmediatamente y si tur cos ta bon, pa luna di April 2017 lo tin un sistema nobo. Segun e mandatario a sigui splica, e sistema lo ta moderno unda cu Dimas por duna permisonan na un manera mas profesional y lo digitalisa tur peticion cu drenta. E mandatario no tabatin informacion di e costo di e sistema hunto cun’e
“Aworaki bo por imagina bo cu un persona ta entrega un dossier y e dossier aki ta yen di rekisito/papel, y cu e sistema nobo lo bay scan esaki y e lo cana u proceso den e trayecto digital pa asina e director entre otro por wak con e documentonan ta pasa cerca cua persona, y e lo por mira si e persona tin e mas tempo cu ta necesario. Tambe lo por wak si e proceso ta tumando mucho mas largo cu ta stipula cu e mag dura segun ley. Asina tambe lo tin miho control pa finalmente mehora e servicio tambe. Lo tin cambio di tur ekipo, lo cambia Hardware, computer etc. tambe.”
Cambio maneho Dimas
Di dia cu a cuminsa cu cambio di maneho pa loke ta Dimas su dunamento di permiso, a enfoca riba dunamento di un miho servicio na e persona cu ta pidi e permiso y di otro banda purba acomoda e departamento pa asina ey nan por ta den un miho forma pa duna e servicio ey tambe. Pa e motibo aki segun Sr. Sevinger a drecha e edificio di Dimas algun aña pasa, den un edificio completamente moderno, caminda cu tur hende tin nan luga. Y aworaki ta bay den e di dos parti, cual ta e cambionan ariba menciona. “Nos tambe ta den e proceso di re evalua constantemente e forma con e departamento mes ta traha, mirando con importante e departamento ta, pa mira si tin cambionan cu mester wordo haci. Y si tin cambionan cu mester wordo haci den maneho, mester haci esaki. Finalmente mester bin un cambio di ley tambe, pa asina tur e maneho y e vision nobo di gobierno por ta stipula den ley tambe, pa na momento cu un decision cay contra di un ciudadano, cu e por acudi na hues y por apela su derecho.
Durante di e proceso lo por presenta diferencia di opinion of otro situacionnan fastioso, segun e minister, door di e trabounan. Ta spera cu esaki no ta e caso si, y cu tur cos cana bon hunto. Te cu aworaki no ta premira un problema, pero ta bon pa comunidad sa kico ta tumando luga, den caso cu e sosode. Si dado caso tin problema lo informa pueblo tocante esaki, e mandatario a bisa.
“Dimas ta un di e departamentonan di mas importante pa nos pais, pasobra ta trata cu permisonan di hendenan cu kier traha akinan entre otro y ta procesa mas cu 15 mil peticion pa aña. Considerando esaki, cu e sistema nobo, tur cos lo funciona hopi mas miho
Organisacion maneho peticion permiso
No tabatin cambio den top di Dimas, e director ta Sra. Paskel – Ruiz. Antes tabatin un sistema di proceso di permiso unda cu e persona ta cana for di front desk, pa intermedio y na final un hende mester tuma decision. A constata despues cu e manera aki no tabata corecto como cu pa loke ta e documentonan na final, no tabatin un hende cu ta responsabel pa e documento, sea si el a wordo nenga of el a haya permiso. Consecuentemente Dimas mes a bin cu proposicion pa pone esakinan den diferente ‘union’ y e ora ey na final di e proceso tin un hende responsabel pa henter e trayecto di permiso cu a wordo pidi. Si ta permiso di trabou e ta cana un trayecto, si ta simplemente un extension di estadia, e ta cana otro trayecto, permiso pa casa ta cana un proceso etc. E director asina semper por wak si e proceso ta cana conforme ley, cua tin retraso, pakico, cua ta cana miho etc. Tambe por saca informacion si tin persona den un cierto unidad, si por ehempel nan mester asistencia pa e proceso cana mas miho, of cu no ta compronde e proceso y por wordo yuda.
