E actual politica di subsidio tin dos base, cu un sistema di output di subsidio introduci na 2016, pa cual no tin base legal. E ordenansa di subsidio basa riba input di 1990 ainda ta na vigor.

Segun un articulo di Economisch Bureau Amsterdam publica durante weekend, e rekisitonan poni pa aplicacion y hustificacion di subsidio tin biaha ta irealistico y superfluo. E situacion aki ta conduci na obstaculo y ‘bottleneck’ den implementacion di e politica di subsidio.

Tin obstaculo den e legitimacion di subsidio, fayo pa cumpli cu e rekisitonan no tin consecuencia riba otorgamento di subsidio, y ta duna tiki atencion na eficiencia. Otorgamento di subsidio a converti, den un modo di bisa, un proceso automatico.

EBA ta haci propuesta pa un sistema di subsidio eficiente cu un miho separacion entre politica y implementacion, consideracion y evaluacion di politica explicito, subsidionnan multianual, y rekisitonan realistico pa aplicacion y responsabilisacion. Plannan concreto stap-pa-stap a wordo lansa pa tur e aspectonan aki, y a haci propuestanan cu ta personalisa pa e practica Arubano.

Tambe ta recomenda pa e iniciativanan existente den e sector di institucionnan subsidia logra cu consolidacion, aumento den escala y profesionalisacion ta stimula y facilita pa gobierno di Aruba. Esaki, segun EBA, ta bay contraresta e fragmentacion existente den e horizonte di subsidio.

Finalmente, ta conclui cu un sistema di subsidio exitoso no por consisti solamente di regla y proceduranan imponi pa gobierno. E sector di institucionnan subsidia tambe tin su propio responsabilidad ora ta trata di gasto adecua di fondonan publico, transparencia, responsabilidad y bon gobernacion.

E sector ta reconoce e importancia di bin cu su propio regla y standardnan den e ramo di bon gobernacion, publicacion di cuenta y reportenan anual, standard, certificacion, of un marca di calidad.

Pa por logra implementacion exitoso, relacionnan existente di subsidio cu institucionnan mester wordo reevalua prome, y e subsidionan cu ya a wordo paga mester ricibi un settlement final. E sistema di subsidio nobo e ora ey por cuminsa di nobo. Segun EBA, tambe ta esencial pa e institucionnan subsidia y directoradonan di politica ta involucra di cerca den e proceso di implementacion.